|
| 1 |
|
| Kè bô jōa kú, Iâ-so͘ ta̍k siâⁿ-chhī ta̍k chng-siā kiâⁿ-thàu-thàu thoân-tō, soan-iông Siōng-tè-kok ê hok-im. Cha̍p-jī sù-tô͘ kap I chòe-tīn, |
|
| 2 |
|
| ū chi̍t-kóa bat hō͘ siâ-sîn hū-sin á-sī phòa-pīⁿ hō͘ Iâ-so͘ i-hó ê hū-jîn-lâng mā kap I chòe-hé khì, kî-tiong ū Boa̍t-tāi-lia̍p ê Má-lī-a — Iâ-so͘ bat tùi i sin-chiūⁿ kóaⁿ-chhut chhit ê kúi, |
|
| 3 |
|
| Hi-lu̍t ê koán-ke Khó͘-sat ê bó͘ Iok-a-ná, kap So͘-sat-ná, í-ki̍p kî-tha chin chōe hū-jîn-lâng, in bat ēng ka-kī ê châi-bu̍t ho̍k-sāi Iâ-so͘ kap I ê bûn-tô͘. |
|
| 4 |
|
| Ū chi̍t tōa-tīn lâng tùi ta̍k-ê siâⁿ-chhī it-ti̍t chū-chi̍p lâi Iâ-so͘ hia ê sî, I ēng phì-jū kā in kóng: |
|
| 5 |
|
| “Ū chi̍t ê iā chéng-chí ê lâng chhut-khì iā chéng-chí. I iā ê sî, ū-ê lak tī lō͘-piⁿ, hō͘ lâng ta̍h, khong-tiong ê chiáu kā i chia̍h-liáu-liáu. |
|
| 6 |
|
| Ū-ê lak tī chio̍h-thâu tōe, in-ūi bô chúi-hun, hoat--chhut-lâi chiū ta--khì. |
|
| 7 |
|
| Ū-ê lak tī chhì-phè lāi, chhì-á kap chéng-chí pîⁿ-pîⁿ tōa-châng--khí-lâi, soah kā i hip--sí. |
|
| 8 |
|
| Ū-ê lak lo̍h-khì hó thó͘-tōe, tōa-châng--khí-lâi, kiat-si̍t chi̍t-pah pē.” Chiah-ê ōe kóng soah, Iâ-so͘ koh tōa-siaⁿ kóng, “Ū hī-khang thang thiaⁿ ê lâng, tio̍h thiaⁿ!” |
|
| 9 |
|
| Iâ-so͘ ê bûn-tô͘ mn̄g I chit-ê phì-jū sī sím-mi̍h ì-sù. |
|
| 10 |
|
| I kóng, “Siōng-tè-kok ê ò-pì í-keng ū hō͘ lín chai, m̄-kú tùi pa̍t-lâng chiū ēng phì-jū, beh hō͘ In khòaⁿ, mā khòaⁿ bô, thiaⁿ, mā bô liáu-kái.” |
|
| 11 |
|
| “Chit-ê phì-jū ê ì-sù sī án-ni: Chéng-chí sī Siōng-tè ê sìn-sit. |
|
| 12 |
|
| Lak tī lō͘-piⁿ--ê, sī lâng thiaⁿ-tio̍h sìn-sit, Mô͘-kúi sûi-sî lâi, tùi in sim-lāi chiong sìn-sit chhiúⁿ--khì, chiah bōe hō͘ in sìn lâi tit-kiù. |
|
| 13 |
|
| Lak tī chio̍h-thâu tōe--ê, sī lâng thiaⁿ-tio̍h sìn-sit, sûi-sî hoaⁿ-hí chiap-siū, put-kò bô tèng-kun, chí-ū chiām-sî sìn, chi̍t-ē tú-tio̍h chhì-liān chiū pàng-sak. |
|
| 14 |
|
| Lak tī chhì-phè lāi--ê, sī lâng thiaⁿ-tio̍h sìn-sit liáu-āu, siū-tio̍h seng-oa̍h ê khòa-lū, chîⁿ-châi kap hióng-lo̍k ê chó͘-gāi, sìn-sit siū hip--sí soah bōe sêng-se̍k. |
|
| 15 |
|
| Lak tī hó thó͘-tōe--ê, sī lâng thiaⁿ-tio̍h sìn-sit, ēng sêng-si̍t siān-liông ê sim chiap-siū, nāi-sim thèng-hāu kàu kiat-si̍t.” |
|
| 16 |
|
| “Bô lâng teng tiám liáu ēng àng-á khàm--khí-lâi á-sī khǹg tī bîn-chhn̂g kha, sī kā i chhāi tī teng-tâi téng, thang hō͘ ji̍p--lâi ê lâng khòaⁿ-tio̍h kng. |
|
| 17 |
|
| In-ūi bô chi̍t hāng ún-ba̍t--ê bōe hián-lō͘; bô chi̍t hāng am-khàm--ê bōe lō͘-hiān, bōe hō͘ lâng chai. |
|
| 18 |
|
| “Só͘-í, tio̍h chù-ì beh án-chóaⁿ thiaⁿ; in-ūi ū--ê, beh hō͘ i koh-khah chōe; bô--ê, liân i ka-kī siūⁿ-kóng ū--ê mā beh kā i chhiúⁿ--khí-lâi.” |
|
| 19 |
|
| Iâ-so͘ ê lāu-bú kap hiaⁿ-tī lâi chhē I, m̄-kú lâng chin chōe, bōe-tàng óa--khì. |
|
| 20 |
|
| Ū lâng kā I kóng, “Lí ê lāu-bú kap hiaⁿ-tī khiā tī gōa-bīn beh kìⁿ lí.” |
|
| 21 |
|
| Iâ-so͘ tùi in kóng, “Thiaⁿ Siōng-tè ê ōe ū khì si̍t-hêng ê lâng chiū-sī góa ê lāu-bú, góa ê hiaⁿ-tī.” |
|
| 22 |
|
| Ū chi̍t ji̍t, Iâ-so͘ kap I ê bûn-tô͘ chiūⁿ-chûn ê sî kā in kóng, “Lán kè lâi-khì hit-pêng hōaⁿ.” In chiū khui-chûn. |
|
| 23 |
|
| Chûn teh kiâⁿ ê sî, Iâ-so͘ khùn--khì. Hut-jiân ū chi̍t chūn tōa-hong sàu lo̍h-lâi ô͘--ni̍h, chûn hō͘ chúi im kàu beh móa, chin gûi-hiám. |
|
| 24 |
|
| Bûn-tô͘ khì kā I kiò-chhíⁿ, kóng, “Lāu-su, lāu-su, lán beh bô-miā lo͘h!” Iâ-so͘ chhíⁿ--khí-lâi, chek-pī hong kap tōa-éng, hong-éng tiāⁿ, it-chhè chiū chēng-chēng. |
|
| 25 |
|
| Iâ-so͘ tùi bûn-tô͘ kóng, “Lín ná hiah-ni̍h bô sìn-sim?” In kiaⁿ-hiâⁿ koh kî-koài, tāi-ke kóng-lâi-kóng-khì, “Chit-ê sī sím-mi̍h-lâng? I chi̍t-ē bēng-lēng, liân hong kap éng lóng sūn-ho̍k.” |
|
| 26 |
|
| Iâ-so͘ kap bûn-tô͘ chē-chûn khì Ka-lī-lī ê tùi-bīn hōaⁿ, Kek-la-sim -lâng ê tōe-khu. |
|
| 27 |
|
| Iâ-so͘ lo̍h-chûn chiūⁿ-hōaⁿ; ū chi̍t ê kúi hū-sin ê lâng tùi siâⁿ--ni̍h chhut--lâi tú-tio̍h I. Chit-ê lâng í-keng chin kú bô chhēng-saⁿ, mā bô tòa tī chhù-lāi, lóng tòa tī bōng-á-po͘. |
|
| 28 |
|
| I chi̍t-ē khòaⁿ-tio̍h Iâ-so͘, chiū phak tī I ê bīn-chêng, tōa-siaⁿ hoah, “Chì-koân Siōng-tè ê Kiáⁿ Iâ-so͘, lí mài chhap--góa! Góa khún-kiû lí, m̄-thang kā góa khó͘-chhó͘!” |
|
| 29 |
|
| In-ūi Iâ-so͘ ū bēng-lēng siâ-sîn tùi chit-ê lâng chhut--khì. Siâ-sîn bat chin chōe pái kā i lia̍h--teh, lâng kā i koaiⁿ--khí-lâi, ēng thih-liān kā i liān, ēng kha-khàu kā i khàu, m̄-kú i kā só-liān lóng chhoah-tn̄g, koh hō͘ kúi kóaⁿ-khì khòng-iá. |
|
| 30 |
|
| Iâ-so͘ mn̄g i, “Lí kiò-chòe sím-mi̍h miâ?” I ìn kóng, “Kun-thoân”, in-ūi ū chin chōe kúi kā i hū-sin. |
|
| 31 |
|
| Kúi ai-kiû Iâ-so͘ m̄-thang bēng-lēng in ji̍p-khì chhim-ian. |
|
| 32 |
|
| Hit-sî, hù-kūn ê soaⁿ-phiâⁿ ū chi̍t tōa-kûn ti teh thó-chia̍h, kúi chiū kiû Iâ-so͘ hō͘ in ji̍p-khì ti-kûn. Iâ-so͘ chún--in. |
|
| 33 |
|
| Kúi chiū tùi hit-ê lâng chhut--khì, chìn-ji̍p ti-kûn. Kui-kûn ti chiū tùi soaⁿ-phiâⁿ chông lo̍h-khì ô͘--ni̍h tū-sí. |
|
| 34 |
|
| Hiah-ê chhī ti ê lâng khòaⁿ-tio̍h só͘ hoat-seng ê tāi-chì, kiaⁿ kah cháu-khì siâⁿ-lāi kap hiong-chhoan pò lâng chai. |
|
| 35 |
|
| Chèng-lâng chiū chhut-lâi beh khòaⁿ hoat-seng sím-mi̍h tāi-chì. In lâi kàu Iâ-so͘ hia, khòaⁿ-tio̍h siâ-sîn í-keng tùi i chhut--khì hit-ê lâng ū chhēng-saⁿ, cheng-sîn chèng-siông, chē tī Iâ-so͘ ê kha-chêng, in chiū chin tio̍h-kiaⁿ. |
|
| 36 |
|
| Khòaⁿ-tio̍h chit-ê tāi-chì ê lâng chiū chiong hit-ê hō͘ kúi hū-sin ê lâng án-chóaⁿ tit-tio̍h i-hó ê tāi-chì kā chèng-lâng pò-kò. |
|
| 37 |
|
| Kek-la-sim hù-kūn só͘-ū ê lâng kiû Iâ-so͘ lī-khui in hia, in-ūi in hui-siông kiaⁿ-hiâⁿ. Iâ-so͘ chiū chē-chûn tò-tńg--khì. |
|
| 38 |
|
| Kúi tùi i chhut--khì hit-ê lâng kiû Iâ-so͘, ài-beh tè I khì. M̄-kú Iâ-so͘ kiò i tńg--khì, kóng, |
|
| 39 |
|
| “Tńg-khì lín tau, chiong Siōng-tè ūi-tio̍h lí só͘ chòe it-chhè ê tāi-chì pò hō͘ lâng chai.” Hit-ê lâng chiū tńg--khì, chiong Iâ-so͘ ūi-tio̍h i só͘ chòe hiah-ni̍h tōa ê tāi-chì thoân-iông hō͘ choân-siâⁿ ê lâng chai. |
|
| 40 |
|
| Iâ-so͘ tńg--lâi ê sî, ū chi̍t tīn lâng kā I hoan-gêng, in-ūi in lóng teh thèng-hāu I. |
|
| 41 |
|
| Ū chi̍t ê hōe-tn̂g ê chú-koán miâ kiò-chòe Ia̍p-ló͘ lâi, i chi̍t-ē khòaⁿ-tio̍h Iâ-so͘ chiū phak tī I ê kha-chêng, khún-kiû I khì in tau. |
|
| 42 |
|
| In-ūi i cha̍p-jī-hè ê to̍k-siⁿ cha-bó͘-kiáⁿ teh-beh sí ah. Iâ-so͘ chiū kap i khì; ū kui tōa-tīn lâng mā oe-oe-khoeh-khoeh tè I khì. |
|
| 43 |
|
| Hit-sî, ū chi̍t ê hū-jîn-lâng tì-tio̍h hiat-lāu-pīⁿ í-keng cha̍p-jī nî kú, sui-jiân kheng-ka-tōng-sán chhē i-seng, m̄-kú bô lâng ōe-tàng kā i i-hó. |
|
| 44 |
|
| I kiâⁿ óa-khì Iâ-so͘ ê āu-bīn, bong I saⁿ-á-ku ê chhiu, i ê hiat-lāu sûi-sî chí. |
|
| 45 |
|
| Iâ-so͘ kóng, “Sím-mi̍h-lâng kā góa bong?” Tāi-ke lóng kóng bô. Pí-tek kóng, “Lāu-su, sī kûn-chiòng khoeh-lâi-khoeh-khì ê sî kā lí khoeh--tio̍h.” |
|
| 46 |
|
| Iâ-so͘ kóng, “Ū lâng kā góa bong--tio̍h, in-ūi góa chai ū tōa lêng-le̍k tùi góa chhut--khì.” |
|
| 47 |
|
| Hū-jîn-lâng chai-iáⁿ am-khàm bōe tiâu, chiū phi̍h-phi̍h-chhoah, lâi phak tī Iâ-so͘ ê kha-chêng, tī chèng-lâng ê bīn-chêng kóng i sī-án-chóaⁿ bong Iâ-so͘, koh i ê pīⁿ án-chóaⁿ sûi-sî hó--khì. |
|
| 48 |
|
| Iâ-so͘ kā i kóng, “Cha-bó͘-kiáⁿ, lí ê sìn-sim hō͘ lí hó--khì lah, pêng-an tò--khì.” |
|
| 49 |
|
| Iâ-so͘ iáu-teh kóng ê sî, ū lâng tùi hōe-tn̂g chú-koán ê chhù lâi, kā Ia̍p-ló͘ kóng, “Lí ê cha-bó͘-kiáⁿ í-keng sí--khì, m̄-thang koh lô-hoân lāu-su.” |
|
| 50 |
|
| Iâ-so͘ thiaⁿ--tio̍h chiū kā Ia̍p-ló͘ kóng, “M̄-bián kiaⁿ, chí-ū sìn, i ōe hó--khí-lâi.” |
|
| 51 |
|
| Iâ-so͘ lâi kàu in tau ê sî, Pí-tek, Iok-hān, Ngá-kok, kap gín-á ê pē-bú í-gōa, m̄-chún pa̍t-lâng kap I chòe-hé ji̍p--khì. |
|
| 52 |
|
| Tāi-ke lóng ūi-tio̍h sí--khì ê cha-bó͘ gín-á teh háu teh khàu. Iâ-so͘ kóng, “M̄-thang khàu, in-ūi i m̄-sī sí--khì, sī teh khùn.” |
|
| 53 |
|
| In-ūi in lóng chai hit-ê cha-bó͘ gín-á í-keng sí--khì, chiū kā I thí-chhiò. |
|
| 54 |
|
| Iâ-so͘ khan cha-bó͘ gín-á ê chhiú, tōa-siaⁿ kóng, “Cha-bó͘ gín-á, khí--lâi!” |
|
| 55 |
|
| I chiū hôe-hûn, sûi-sî peh--khí-lâi. Iâ-so͘ hoan-hù in tio̍h hō͘ cha-bó͘ gín-á chia̍h. |
|
| 56 |
|
| I ê pē-bú hui-siông tio̍h-kiaⁿ. Iâ-so͘ bēng-lēng in m̄-thang chiong só͘ hoat-seng ê tāi-chì pò lâng chai. |
|
|
|
|