Buluka penepo, Yezu akhafamba m'mizinda na m'pisa, kwenda mbalonga Mphangwa Zadidi za Umambo wa Mulungu. Apoxtolo ace khumi na awiri akhaenda na iwo pabodzi.
Pa nsoka unowu akhalipombo akazi anango akhadawangiswa nthenda zawo za mizimu ya kuipa na nthenda zinango. Akazi enewa mbawa: Mariya, anacemerwa Madhalena, ule akhadabulusiwa na Yezu mizimu minomwe ya kuipa.
Na Juwana, nkazace Kuza, ule akhali nyabasa wa nkulu wa utongi wa mambo Herodhi, Suzana, na akazi anango azinji. Akazi enewa, akhaphedza Yezu na anyakupfundza ace ene, na mpfuma zawo.
Mbeu zidagwa m'mbale mwa njira, ndi anthu anabva fala ya Mulungu, mbwenye asabwera Sathani mbabulusa fala m'mitima mwawo toera akhonde kutawira Mulungu mbacimwana kupulumuswa.
Mbeu idagwa padzulu pa myala ndi ale anabva fala ya Mulungu mbaitambira na kukomerwa. Mphapo na thangwi ya kusoweka michici, asakwanisa kutawira pa n'dzidzi ung'ono basi. Mbwenye pa n'dzidzi wa kuleserwa, asasiya pyonsene.
Mbeu idagwa pakati pa minga, ndi ale anabva fala ya Mulungu, mbwenye pakumala ntsiku pang'ono, asabwerera na thangwi ya makhaliro a padziko ino, na mpfuma, na udidi wa padziko. Na tenepo, misapu inabala iwo, nkhabe tokota.
Mbeu idagwa pa mataka adidi, ndi anthu anabva fala ya Mulungu mbaikoya na ntima wadidi na wakunyindirika. Na tenepo, anthu enewa asabala misapu na kupirira.”
Na tenepo, lang'anani mbamucita mphole-mphole na mabvero anu a pinthu penepyo. Thangwi ule anapyo, anati apaswe pontho pinango. Mbwenye ule adapisowa, anapokoserwa na pire pyene pinanyerezera iye kuti anapyo.”
Yezu mudachita Iye m'bote, abwera kuna Iye mamuna m'bodzi wa mu nzinda unowu, akhadadzala na mizimu ya kuipa. Iye akhala ntsiku zizinji mbali cipezi-pezi, pontho akhakhonda kukhala pa nyumba, mbwenye akhakhala m'masiye.
Iye alonga penepyo, thangwi Yezu akhadaupanga nzimu wa kuipa kuti ubuluke muna mamuna ule. Kazinji kene nzimu wa kuipa ukhamphata mamuna uyu, mpaka kufikira mangiwa myendo na mikono ene na unyolo. Mbwenye mamuna uyu akhauthumula basi unyolo, nzimu wa kuipa mbukhankwata kwenda na iye kutali na anthu.
Na tenepo, mbumba yaenda kaona pikhadacitika. Mudafika iwo dhuzi na Yezu, aona kuti mamuna ule akhadabuluswa mizimu ya kuipa ali nawa n'khundu mwa Yezu, amala bvala nguwo, pontho mbali na ndzeru zace za kubaliwa. Iwo agopserwa napyo.
Na tenepo, mbumba yonsene ya pa cisa ca Djeraza yaphemba kuna Yezu kuti abuluke pa cisa ceneci, thangwi iwo akhagopa pikulu kakamwe. Penepo, Yezu apita m'bote mbabwerera pyace.
“Bwerera ku nyumba kwako ulonge pire pyonsene pidakucitira Mulungu.” Na tenepo, mamuna abuluka mbaenda mu nzinda onsene kwenda mbalonga pire pyonsene pikhadancitira Yezu.
Na tenepo, afika mamuna m'bodzi anacemerwa Djairo. Iye akhali n'tsogoleri wa nyumba ya kuphemberera. Apo iye agwa patsogolo pa Yezu mbam'phemba pikulu kuti aende na iye ku nyumba kwace.
Thangwi mwana wace m'bodzi basi wankazi, akhathamangira pyaka khumi na piwiri pya kubaliwa, akhali dhuzi na kufuna kufa. Apo Yezu mukhaenda Iye, akhaenda mbapfinyana na mwinji wa anthu.
Penepo akhalipo nkazi m'bodzi akhathabuka na utenda wakubuluka ciropa pa pyaka khumi na piwiri. Iye akhadabvunga pyonsene pikhali na iye kuna anyakukondza, mbwenye nkhabe munthu m'bodzi akhadankwanisa kumuwangisa.
Na tenepo, nkazi na kuona kuti aoniwa, acimwana kubisa. Abwera na kutetemera, agwa pa myendo pa Yezu, mbalonga pamaso pa anthu onsene, thangwi yanji an'khuya pontho na kuwangiswa kwa nthenda yace pa n'dzidzi ubodzi ene.
Yezu mbadzati kumala kulonga, afika munthu m'bodzi wa ku nyumba ya Djairo, n'tsogoleri wa nyumba ya kuphemberera, mbalonga kuti: “Mwana wanu wankazi afa. Lekani kunsanyabve Mpfundzisi.”
Yezu pidafika iye ku nyumba kwa Djairo, akhondesa anthu kupita na Iye n'nyumba. Mbwenye atawirisa kupita na Pedhru na Juwau na Tiyago basi ene, pontho na baba na mai wa mwana.