फेर यीसू केयो, “मैं साची साची केऊं जे कोई भेड़ा गै बाडै़ में जाणो होवै तो बारनै गै माखर जाणो चईयै पण जे कोई ओर रा ऊं चढ गे जावै है तो बो चोर अर डाकू है।
अर भेड़ा गो चोकीदार बिंगै खातर बारनो खोल देवै है अर बो भेड़ा गो नाम लेगे बुलावै है अर भेड़ा बिंगी आवाज सुणगे बिनै पिछाण लेवै है अर बो बानै चराण खातर बारै ले जावै है।
झिको गुआळियो पीसा लेगे भेड़ा गी रुखाळी करै है बो ना तो गुआळियो है अर ना बांगो मालिक है। बे जंगळी भेड़िय नै आवंता देखगे, भेड़ा नै छोड़गे भाज जावै है अर जंगळी भेड़ियै बानै पकड़गे अर इनै बिनै कर देवै है।
पण भेड़ा गी आच्छी देखभाल करण आळो गुआळियो मैं ईं हूं। जिंया मेरो पिता मनै जाणै बिंया मैं बी आपगी भेड़ा नै जाणू हूं अर मेरी भेड़ा नै बचाण खातर में आपगी जान बी दे देऊं हूं।
मेरी ओर बी भेड़ा है झिकी ईं भेड़ा गै बाडै़ में कोनी बानै बी ईं बाडै़ में लेगे आणो जरूरी है। बे मेरी आवाज सुणैगी अर ईं बाडै़ में आ'गे एक ई भेड़ा गो माल अर एक ई गुआळियो हो'सी।
मेरी जान कोई लेवै कोनी पण मैं अपणै आप इनै आपगी इच्छा ऊं बिनै देऊं हूं। मेरै कनै इनै देण गो अधिकार है अर पाछी लेण गो बी अधिकार है। ओ आदेस मेरै पिता परमेसर दियो है।”
यीसू बानै उतर दियो कै, “मैं पेलां ईं थानै के दियो है कै मैं बो ई हूं। पण थे लोग मेरै केण पर बिस्वास कोनी करो अर मेरै पिता गै देएड़ै अधिकार ऊं झिकै चमत्कारा गो काम करूं हूं बे ई मेरी गवाई देवै है कै मैं बो ई हूं।
म्हानै ठा है कै परमेसर गै बचन में झिको लिखेड़ो है कदी झूठ कोनी होवै अर झिकै लोगां नै परमेसर गो बचन दियो गेयो बानै बण ईस्वर केयो अर पिता परमेसर बांगै काम गै खातर मनै पवितर कर'गे संसार में भेज्यो है। ईंखातर मैं केयो, “मैं परमेसर गो बेटो हूं।” अर जद मैं इंया केऊं हूं तो थे क्यूं बोलो हो कै मैं परमेसर गी बेजती करूं हूं।
पण जे मैं पिता गो काम करूं हूं तो चायै थे मेरै उपर बिस्वास ना बी करो, पण मैं झिका चमत्कार गा काम करया है बां पर तो बिस्वास करो। जद थे जाणोगा अर समझोगा कै पिता मेरै में है अर मैं पिता में हूं।
अर भोत लोग यीसू गै कनै आ'गे आपसरी में बात करता हा कै यूहना बतिस्मो देण आळो तो कदी चमत्कार कोनी दिखाया पण ईं आदमी गै बारै में बण झिको बतायो हो बो सारो सच्च है।