|
| 1 |
|
| “Ekeene, ekeene, nabatebirie: Oyotasoereti egesieri ki’eero ye ching’ondi, korende aetere aao, oyio nomoibi naende nomokurumi. |
|
| 2 |
|
| Korende oyogosoera gesieri oyio nomorisia bwe ching’ondi. |
|
| 3 |
|
| Omorendi bw’egesieri nigo akomoigorera, ne ching’ondi nigo chikoigwa eriogi riaye; ere nigo akorangeria ching’ondi chiaye ase amarieta abo na gochiira isiko. |
|
| 4 |
|
| Gakorusia isiko ching’ondi echire echiaye, nigo agochitang’ana, ne ching’ondi nigo chikomotunyana, ekiagera nchimanyete eriogi riaye. |
|
| 5 |
|
| Omonto omoao tichikomotunyana nonya ng’ake, korende nigo chiramotame, ekiagera tichimanyeti eriogi ri’abanto abaao.” |
|
| 6 |
|
| Omoreng’anio oyo Yeso akabatebia, korende barabwo tibamanyete amang’ana ayio abatebetie. |
|
| 7 |
|
| Erio Yeso akabatebia naende, “Ekeene, ekeene, nabatebirie: Ninche inde egesieri gie ching’ondi. |
|
| 8 |
|
| Bonsi abantang’anerete nabaibi na abakurumi, korende ching’ondi tichiabaigwete. |
|
| 9 |
|
| Ninche inde egesieri; omonto karasoe goetera asende, natooreke, nasoe na gosoka, na konyora oborisia. |
|
| 10 |
|
| Omoibi tagocha, otatiga aibe, na konyenya, na gosaria; inche nigo nachete erio babe nobogima, naende babe naborobwo obonge. |
|
| 11 |
|
| Inche ninche Omorisia omuya; omorisia omuya nigo akorua obogima bwaye ase engencho ye ching’ondi. |
|
| 12 |
|
| Omonto orikire, tari ere omorisia, gose ching’ondi tichiri echiaye; gakorora esese y’orosana egocha, nigo agotiga ching’ondi, otama, na esese y’orosana yachisakora, na gochiserebania. |
|
| 13 |
|
| Ere nigo agotama ekiagera nomorikwa, gose tarengerereti amang’ana e ching’ondi. |
|
| 14 |
|
| Inche ninche omorisia omuya, na echire echiane ninchimanyete, na echire echiane nchimanyete, |
|
| 15 |
|
| buna Tata amanyete inche, na inche nimomanyete Tata, na obogima bwane naborure ase engencho ye ching’ondi. |
|
| 16 |
|
| Naende ching’ondi chinde mbwate, chitari chie riicho eri, na chirochio nabo engwenerete gochirenta, na eriogi riane nachiriigwe. Igo nachibe riicho erimo na omorisia oyomo. |
|
| 17 |
|
| Ase ayio Tata nanyanchete, ekiagera narure obogima bwane, erinde inyare koboirania naende. |
|
| 18 |
|
| Tari omonto okobonduera, korende ninche omonyene naborure. Ninde nokobua koborua; naende ninde nokobua koboirania. Ogochika oko nigo nakonyorire ase Tata one.” |
|
| 19 |
|
| Erio gokaba naende ogwatananekana ase Abayahudi ase engencho y’amang’ana aya. |
|
| 20 |
|
| Abange babo bakabora, “Nigo abwatire nekerecha, naende nigo are ebarimo; nase ki mokomotegerera?” |
|
| 21 |
|
| Abande bakabora “Amang’ana aya tari ay’omonto obwatire nekerecha. Inee! Ekerecha nkenyare koramokia amaiso ’emeuko?” |
|
| 22 |
|
| Ndiarenge Rituko Rinene ri’okoinyora okoigorwa na ogosaberwa gwe Hekalu aria Yerusalemu. |
|
| 23 |
|
| Nigo kiarenge ekero ki’obokendu, na Yeso nigo arenge gotaara ase Hekalu ime, ase egoora ya Sulemani. |
|
| 24 |
|
| Erio Abayahudi bakamoetanana, bakamoboria, “Ngoika ririri oratoichanie emioyo yaito? Onye naye Kristo, totebia maiso marore.” |
|
| 25 |
|
| Yeso akabairaneria, “Nabatebirie, na inwe timori kwegena; emeremo eye ngokora ase erieta ria Tata one, nero ekombera kirori. |
|
| 26 |
|
| Korende inwe timori kwegena, ekiagera timori abamo ase ching’ondi chiane. |
|
| 27 |
|
| Ching’ondi chiane nigo chikoigwa eriogi riane, na inche ninchimanyete, na chirochio nigo chigontunyana; |
|
| 28 |
|
| inche nachieire obogima bwa kare na kare, na chirochio tichigosira nonya ng’ake, nonya nomonto tagochitaboria korwa ase okoboko kwane. |
|
| 29 |
|
| Tata one oching’eire nomonene kobua bonsi, na onde takonyara gochitaboria korwa ase okoboko gwa Tata. |
|
| 30 |
|
| Inche na Tata nigo tore oyomo.” |
|
| 31 |
|
| Erio Abayahudi bakaimokia amagena naende, erinde bamoake. |
|
| 32 |
|
| Yeso akabairaneria, “Naborokirie emeremo emiya emenge erwete ase Tata; nereri ase emeremo eyio mokong’akera amagena?” |
|
| 33 |
|
| Abayahudi bakamoiraneria, “Titogokoaka amagena ase emeremo emiya, korende nase okorama, ekiagera aye nomonto ogwekora omonyene ng’a naye Nyasae.” |
|
| 34 |
|
| Yeso akabairaneria, “Tarikiri ase amachiko aino ng’a: Inche natebete ng’a inwe nigo more chinyasae? |
|
| 35 |
|
| Onye orogete baria chinyasae, abacheretwe ne ring’ana ria Nyasae (na amariko takonyara gosareka), |
|
| 36 |
|
| inee, nigo mogoteba igoro yaye, ere oyo Tata aatananete akamotoma ase ense: Nkorama are, ekiagera nateba: Inche n’Omwana o Nyasae? |
|
| 37 |
|
| Onye tindi gokora emeremo ya Tata one, timonyegena. |
|
| 38 |
|
| Korende konda yekore, nonya timonyegeneti inche, egene emeremo eria, monyare komanya na kwegena ng’a Tata nigo are ime yane, na inche ime ase Tata.” |
|
| 39 |
|
| Bakarigia eria kabere komobwata, korende akarua ase amaboko abo. |
|
| 40 |
|
| Akagenda naende ng’umbu ya Yorodan goika aase aria Yohana arenge kobatisera ritang’ani, akabeera aroro. |
|
| 41 |
|
| Abanto abange bakamochiera, bakabora, “Yohana takorete egekone kende gionsi, korende onsi aya Yohana atebete igoro y’omonto oyo nigo are ay’ekeene.” |
|
| 42 |
|
| Abange bakamwegena aroro. |
|
|
|
|