Mâri ta spinâ thaw ropahâh ngaitapa ôh kha vaw cheih ta, Zisu phei liata thu ta, a sâ ta a pheizy cha hru ta. O cha sathaw ropahâhpa ta bie khai ha ta.
Chyhsa dyhchhiepazy a pachâpa vâta châ leipa ta, parupa châ ta, tâkâ sahria â vaopa chhôh liata sopazy a la tyhpa a châpa vâta, cha bie cha a reipa a châ.
Cha su liata Zisu a y tahpa Zu chyhsa hluhpi ta ama vaw pahno nahta, a vy ei ta. Zisu vâ dei châ leipa ta, athihpa hry tawhta a pathyupa Lâzarâh hmô awpa ama khohpa vâta a vypa ama châ.
Cha hmozy cha a hmiatuata la a pachupazy ta pahno thai veih ei. Châhrasala Zisu parônahsapa ta a y tawhna khata, cha hawhta a thâtih ropa châ ta, cha hmozy cha a chô liata ama vaw tao tlai tahpa a thei ha ei ta.
Hmeiseihta ta, hmeiseihta ta ei cha chho ei, sâh hmô cha alei liata tla leipa sala, a thi leipa khiahta cha, ano dei ta y ta, a thi khiahta deikua cha, thei hluhpi a pathei tyh.
Ahy rai eina chakao khiahta la, na zi mawh sy. Nâ chakaotuhpa cha ei yna liata a y hra aw. Ahy rai eina chakao khiahta la, ano cha Paw ta a palyupalih aw.
“Tahmâ he ei palôh nô a po ngaita. Khâpa ma ei reih aw tly? ‘Ei Paw y, he daihti tawhna heta na pachha mah y,’ ei tah aw ma? Châ vei, he hmo tao awpa ta, he daihti he ei vaw tlôpa a châ.
Zawpizy ta a chhy ei ta, “Mesia cha chhâzaw ta a y aw tahpa ryhpa châbu liata eima pahno. Kheihtazieta Chyhsa Sawchapawpa chaluahpa ta a y aw a tahpa ma na châ? Chyhsa Sawchapawpa cha ahy maw?” tah ei ta.
Zisu ta ama hnohta, “Khaihpa cha buakhata nama hry liata a y chy. Khaihpa nama hnei chhôh heta charei teh u, chataleipatala zohna ta a cha pachhai pathlei aw ei. Zohna liata a chareipa cha a sie nawpa pahno vei.
Khaihpa nama hnei chhôh heta, khaihpa he a ngiapâ teh u, chatanachata khaihpa sawzy nama châ aw,” tah ta. Cha biezy cha a rei khai nahta, Zisu cha sie ta, âmo tawhta a nyu ha ta.
“Ama mozy pachao ta, Ama palôh kuh a pachhasa; Chata châ vei mawh sala, Ama mo ta hmô aw ei ta, Ama palôh ta pahnopa ta, A vaw heih aw ei ta, Ei patlâh ha awpa ei tlai,” a tahpa kha a châ.
Chatanachôta ryureituhpa hluhpi ta Zisu cha a ngiapâ ei ta, châhrasala Phârisaihzy ama chipa vâta, pakhyna o tawhta papuapa ama châ lei nawpa ta, amâ ngiapâna cha palâhâh veih ei.
Chyhsa ta ei biezy thei ta, a zyh leipa chhao ta, ano cha pachia aw va na. Khizaw pachia awpa ta a zupa châ leipa na ta, khizaw pachha awpa ta a zupa tlao ei châ.
Ahy rai nâ khoh leipa nata ei bie a zyh leipa cha, pachiatuhpa pakha a hnei. Ei bie reipa, kha bie tlai khata, noh chhâna noh liata ano cha a pachia aw.