Si Maria nagkuha sing isa ka libra nga ihalaplas nga tunay nga nardo nga daku sing bili kag ginhaplasan niya ang mga tiil ni Jesus kag ginpahiran ang iya mga tiil sang iya bohok; kag ang balay natugub sang kaamyon sang ihalaplas.
Nagsiling sia sini, indi kay nabalaka sia sa mga imol kondi kay makawat sia, kag subong nga yara sa iya ang poyo sang cuarta ginkuha niya ang ginsulud sini.
Sang nakahibalo ang dakung kadam-an sang mga Judio nga yadto sia didto, nag-abut sila, indi bangud kay Jesus lamang kondi sa pagtan-aw kay Lazaro man, nga ginbanhaw niya.
Gani nagkuha sila sing mga paklang kag naggowa sa pagsugata sa iya, kag nagsinggit, “Hosanna! Pagdayawon ang nagakari sa ngalan sang Ginoo, ang Hari sang Israel!”
Ang iya mga gintoton-an wala makahangup sini anay; apang sang nahimaya si Jesus, niyan nadumduman nila nga ini nasulat nahanungud sa iya kag ginhimo nila sa iya.
Sa pagkamatuud, sa pagkamatuud, nagasiling ako sa inyo, kon ang binato sang trigo indi maholog sa duta kag mapatay, nagapadayon ini nga isa lamang; apang kon mapatay ini, nagapamunga sing madamu.
Kon ang bisan sin-o nga tawo mag-alagad sa akon, magsonod sia sa akon; kag kon diin ako, didto man ang akon alagad; kon ang bisan sin-o nga tawo mag-alagad sa akon, sia padunggan sang Amay.
“Karon nalisang ang akon kalag. Kag ano bala ang isiling ko, ‘Amay, luwasa ako sa sining takna’? Indi, tungud sa sining katuyoan nag-abut ako sa sining takna.
Ang kadam-an nagsabat sa iya, “Nabatian namon sa kasogoan nga ang Cristo nagapadayon sa gihapon. Paano nga nagasiling ka nga ang Anak sang tawo dapat bayawon? Sin-o bala ining Anak sang tawo?”
Si Jesus nagsiling sa ila, “Sa diotay pa nga tion ang kapawa yara sa tunga ninyo. Lakat sa may kapawa pa kamo, agud nga ang kadudulman indi maglambut sa inyo; ang nagalakat sa kadudulman wala makahibalo kon diin sia nagakadto.
Sang yara sa inyo ang kapawa, magtoo kamo sa kapawa, agud nga mangin-anak kamo sang kapawa.” Ini ginpamolong ni Jesus, kag nagtaliwan sia kag nagpanago gikan sa ila.
ini agud nga matuman ang polong ni Isaias nga manalagna nga ginpamolong niya: “Ginoo, sin-o bala ang nagtoo sang amon balita, kag kay sin-o bala napahayag ang butkon sang Ginoo?”
“Ginbulag niya ang ila mga mata kag ginpatig-a ang ila tagiposoon, basi kon makakita sila sa ila mga mata kag makahantup sa ila tagiposoon, kag magliso agud nga ayohon ko sila.”
Walay sapayan bisan sa mga manugdumala madamu ang nagtoo sa iya, apang bangud sang mga Fariseo wala sila magtu-ad sini, basi kon sikwayon sila sa sinagoga;
Kag kon ang bisan sin-o nga tawo magpamati sang akon mga polong kag wala magbantay sa ila, wala ako nagahukom sa iya; kay ako wala magkari sa paghukom sang kalibutan kondi sa pagluwas sang kalibutan.
Ang nagasikway sa akon kag wala nagabaton sang akon mga polong may isa nga nagahukom sa iya; ang polong nga akon ginpamolong amo ang magahukom sa iya sa katapusan nga adlaw.
Kay ako wala nagpamolong gikan sa akon kaugalingon; kondi ang Amay nga nagpadala sa akon nagsogo sa akon kon ano ang akon isiling kag kon ano ang akon ipamolong.