1
फसै का त्युंहार क छ दिन पेल्या ईसु बेतनिया नगरी म लाजर क घरा गयो, जिनै बो मोतऊँ जीलायो हो।
2
बे बि ताँई रोटी बणाई, मारथा रोटी परोसरी ही। लाजर बी बाकै सागै बेठगो जखा ईसु क सागै रोटी खार्या हा।
3
जणा मरीयम एक बरनी म खरो जटामासी को बणेड़ो मेंगो ईतर ल्याई अर बिनै ईसु क पगा प उंदका दिनी। अर आपका बाळाऊँ बानै पुछी। ईतर की बा बडिया सुगंद सगळा घर म फेलगी।
4
यहूदा इस्करोती नाम को ईसु को एक चेलो जखो आगै चालर बिनै पकड़वायो हो बो बोल्यो,
5
“ओ ईतर तीन सो चाँदी का सीक्का म बेच्यो जाणो चाए हो अर बे पिसा गरीबा म बाटबा चाए हा।”
6
बो आ बात इ ताँई कोनी कही, क बिनै गरीबा की परवा ही, पण बो एक चोर हो। बो रिपीआळी थेली समाळतो हो अर बोळी बार बो बि मऊँ रिपीआ काड लेतो हो।
7
पण ईसु बोल्यो, “इनै मना रोको। मनै गाडबा का दिन को सूण आ पेलीई कर दिनी ह।
8
गरीब तो सदाई थारै सागै रेह्सी, पण म थारै सागै सदाई कोनी रेहस्युं।”
9
जद मिनख सुण्या क ईसु बेतनिया नगरी म ह, जणा बे बठै इ बजेऊँई कोनी, क ईसु बठै ह पण बे लाजरनै बी देखबा गया जिनै ईसु मोतऊँ जीवायो हो।
10
जणा परधान याजक लाजरनै बी मारबा की तरकीब रची।
11
क्युं क लाजर की बजेऊँ बोळा यहूदि मिनख बानै छोडर ईसु क गेल चालबा अर बिस्वास करबा लाग्या।
12
दुसरा दिन बोळी भीड़ जखी फसै का त्युंहार ताँई आईड़ी ही सुणी क, ईसु यरूसलेम आर्यो ह।
13
जणा बे खजूर का दरख्त की डाळ्यां लेर बिऊँ मिलबा गया, अर जोरऊँ बोलर्या हा, “परमेसर की जे हो!” “परबु का नामऊँ आबाळानै परमेसर आसिरबाद दे!” “इजरायल का राजानै परमेसर आसिरबाद दे!”
14
ईसुनै एक गधो दिख्यो अर बो बिपै बेठगो, जंय्यां क पबितर सास्तर म मंडर्यो ह,
15
“यरूसलेम का मिनखो! मना डरो; जवान गधेड़ा प सवार होर, थारो राजा आर्यो ह।”
16
बि टेम बिका चेला बा बातानै कोनी समज सक्या, पण जद ईसु मेमा म उठायो गयो जणा बाकै याद आई क, पबितर सास्तर म बिकै बारां म मांड्यो गयो जणाई बे मिनख बिकै सागै अंय्यां कर्या हा।
17
भीड़ मऊँ बे मिनख जखा ईसु क सागै बि टेम हा जद बो लाजरनै बोल्यो हो कबरऊँ बारनै आज्या अर बिनै मोतऊँ जीवा दिओ हो इ बात को समचार दुसरा मिनखानै दिआ।
18
भीड़ की बिऊँ मिलबा की बजे आ ही क, बे सुण्या हा, क बो ओ चमत्कार कर्यो ह।
19
फरिसी एक दुसराऊँ बोल्या, “थे देखो, आपा क्युंई कोनी कर सक्या! जगत का मिनख बिकै गेल होर्या हीं।”
20
क्युंक यूनानी बी बा मिनखा म हा जखा त्युंहार की टेम भगती करबा यरूसलेम गयड़ा हा।
21
बे गलिल का बेतसदा का रेह्बाळा फलिपूस क कनै गया अर बोल्या, “साय, म्हें ईसुऊँ मिलबो चावां हां।”
22
फलिपूस अंदरिआस क कनै जार बिऊँ बोल्यो, अर बे दोन्यु ईसु कनै गया अर बिनै बोल्यो।
23
ईसु बाऊँ बोल्यो, “बा घड़ी आगी ह जद मिनख का बेटा की मेमा होवै।
24
म थारूँ सची बोलर्यो हूँ, ग्युं को दाणो जद ताँई माटी म नइ पड़ै अर नइ मरै, बो एकलोई रेह्वै ह। पण मर्या पाछै बो बोळो फळै ह।
25
जखा आपका जीवऊँ परेम करी हीं बे बिनै खोसी। अर जखा इ दुनिया म आपका जीवऊँ नफरत करी हीं, बे बिनै अजर-अमर जीवन ताँई राखसी।
26
जखो बी मेरी सेवा करबो चावै ह, बिनै मेरै गेल चालनो पड़सी जिऊँ क मेरा दास मेरै सागैई रेह्वै। जखो मेरी सेवा करसी, बानै मेरो परम-पिता मान देसी।
27
“मेरो जीव इब दुखी ह। मनै काँई बोलबो चाए? के म अंय्यां बोलुँ, ‘परम-पिता, थे मनै इ घड़ीऊँ बचाओ?’ नइ, पण इ घड़ी की पिड़ानै भोगबाई आयो हूँ।
28
परम-पिता, थारै नाम की मेमा होवै!” जणा ईस्बर नगरीऊँ एक उवाज आई, “म मेरी मेमा दिखादि अर ओज्यु दिखास्युं।”
29
बठै खड़ी भीड़ आ उवाज सुणी अर बामैऊँ क्युंक जणा अंय्यां बोल्या कोई बादळ गरज्यो दिखै , पण दुसरा बोल्या, “ईस्बर नगरी दुत इऊँ बतळायो दिखै!”
30
पण ईसु बाऊँ बोल्यो, “आ उवाज मेरै फाईदा की कोनी ह, पण थारा फाईदा की ह।
31
ओ जगत का मिनखा ताँई न्याय को टेम ह, अर इब जगत का राजा सेतान को तक्तो पलट्यो जासी।
32
जद म उचो उठायो जास्युं जणा म सगळानै धरती पऊँ मेरै कानि खींच लेस्युं।”
33
अंय्यां बोलर बो बता दिओ, क बो कंय्यां की मोत मरबाळो ह।
34
भीड़ बोली, “म्हारो पबितर सास्तर बतावै ह क, मसी सदाई जिंदो रेह्सी। जणा थे कंय्यां बोल सको हो क मिनख को बेटो उचो उठायो जासी ? ओ कूणसो मिनख को बेटो ह?”
35
ईसु बोल्यो, “क्युं क टेम ताँई थारै बिचमै च्यानणो होसी। जद ताँई थारै कनै च्यानणो ह, थारा गेला प चालता रेह्ओ जिऊँ अँधकार थारै कनै नइ आ सकै। जखो अँधकार म चालै ह बो कोनी जाणै क बो कठै जार्यो ह।
36
च्यानणा प बिस्वास करो, जद ताँई बो थारै कनै ह जिऊँ क थे च्यानणा का मिनख बणो।” आ बोलर ईसु चलेगो अर खुद बाऊँ लुखर रिह्यो।
37
बो बाकै सामै बोळा चमत्कार कर्यो इकै बावजुद बी बे बिपै बिस्वास कोनी कर्या।
38
जिऊँ यसाया परमेसर की खेबाळा का बोलेड़ा बचन पूरा हो सकै: “ओ परबु, म्हारा समचार प कूण बिस्वास कर्यो? अर परबु की ताकत किपै परगट होई?”
39
इ बजेऊँ बे बिस्वास कोनी कर सक्या। जंय्यां यसाया आ बी बोल्यो ह क,
40
“परमेसर बाकी आँख्यानै आँदी, अर बाका मनानै काठो कर दिओ, जिऊँ क बाकी आँख्या देख कोनी सकै, अर बाको मन समज कोनी सकै, कदै अंय्यां नइ होवै क बे खुदको मन मेर म लगावीं, अर म बानै निरोगो करूं।”
41
यसाया अंय्यां इ ताँई बोल्यो हो, क्युं क बो ईसु की मेमा देख लिओ हो, अर बिकै बारां म बोल्यो।
42
बोळा यहूदि नेता बी ईसु प बिस्वास कर्या। पण फरिसीया की बजेऊँ बे चोड़ै म इपै बात कोनी करता हा। क्युं क बानै डर हो क बे बानै अरदास हाळी झघाऊँ बारनै काड देसी।
43
बे परमेसर की बजाय मिनखाऊँ बेत्ती मान चाता हा।
44
ईसु जोरकी उवाज म बोल्यो, “जखा बी मेर प बिस्वास करै ह, बे मेर पई नइ पण मनै भेजबाळा प बी बिस्वास करै ह।
45
जखा मनै देखी हीं बे मनैई नइ पण मनै भेजबाळानै बी देखै ह।
46
म जगत म च्यानणा की जंय्यां आयो, जिऊँ मेर प बिस्वास करबाळा अँधेरा म नइ पड़्या रेह्वै।
47
“जखा बी मिनख मेरा बचनानै सुणर बानै कोनी मानै, म बाको न्याय कोनी करूं। म इ जगत का मिनखा को न्याय करबानै कोनी आयो पण आनै बचाबानै आयो हूँ।
48
बे जखा मनै अर मेरा बचनानै कोनी मानी, बाको न्याय करबाळो एक ह, बोई बाको न्याय करसी। मेरा बोल जखा म बोल्यो हो, बेई बानै आखरी दिन दोसी बतासी!
49
ओ सच ह, क्युं क म मेरी मरजीऊँ क्युंई कोनी बोल्यो, पण मनै भेजबाळा परम-पिता का हुकमऊँ जखो मनै बोलबो चाए हो, बोई बोल्यो।
50
अर म जाणू हूँ क, बिको हुकम अजर-अमर जीवन कानि लेज्यावै। म बोई बोलुँ हूँ, जखो परम-पिता मनै बोलबा ताँई बोलै ह।”
Shekhawati Bible 2010
(c) 2010-2017, New Life Computer Institute.