यीसू बिनै केयो, “फिलिप्पुस, मैं इतै लम्बै टेम ऊं तेरै सागै हूं अर अजे तांई तूं मनै कोनी जाणै है। तूं पिता नै देख लियो है, फेर तूं किंया केवै है म्हानै पिता दिखा दे।
के तनै बिस्वास कोनी है कै मैं पिता में रेऊं हूं अर पिता मेरै में रेवै है? ऐ बातां झिकी मैं थानै केऊं हूं। आपगै कनै ऊं कोनी केऊं, पण मेरै में रेण आळो पिता आपगा काम मेरै द्वारा करै है।
मैं थानै साची साची केऊं हूं झिका काम मैं करूं हूं मेरै उपर बिस्वास करण आळो बी बे काम करैगो। मैं पिता गै कनै जाऊं हूं सच्च में बो आं कामा ऊं बी मोटा काम करैगो।
बो मदद करण आळो सच्चाई गो आत्मा है। ईं दुनिया में बिनै कोई कोनी मानै। क्यूंकै ईं दुनिया में बिनै देख्यो कोनी अर जाण्यो बी कोनी। थे बिनै जाणो हो क्यूंकै बो थारै सागै रेवै है अर आ'गै बी थारै सागै रेवैगो।
झिका मेरी आग्या नै मानगे बिंगै उपर चालै है बे मेरूं प्रेम करै है। झिका मनै प्रेम करै है बानै मेरो पिता बी प्रेम करै है। अर मैं बी बिंऊं प्रेम करूंगा। अर मैं अपणै आपनै बिं पर परगट करूंगा।”
थे मनै केवंता सुण्यो है कै मैं जाऊं हूं अर थारै कनै फेर आऊंगा। जे थे मेरूं प्रेम करता तो राजी होवंता कै मैं पिता परमेसर कनै जाऊं हूं। क्यूंकै पिता मेरूं मोटो है।