×

Bagri Bible

यूहना 14

1
“थारो मन दुखी नई होणो चईयै। परमेसर में बिस्वास राखो अर मेरै में बी बिस्वास राखो।
2
मेरै पिता गै घर में रेण खातर भोत जिग्यां है। मैं थारै खातर जिग्यां तैयार करण खातर जाऊं हूं। जे जिग्यां ना होवंती तो मैं थानै बता देवंतो।
3
अर मैं बठै जाऊंगा अर थारै खातर जिग्यां तैयार करूंगा तो मैं फेर अठै आऊंगा अर थानै आपगै सागै ले जाऊंगा कै जठै मैं रेऊं बठै थे बी रेओ।
4
अर जठै मैं जाऊं हूं थे बठै गो रा जाणो हो।”
5
थोमा केयो, “म्हे कोनी जाणा प्रभु थे कठै जाण लागरया हो? फेर म्हे बठै गो रा किंया जाण सकां हां?”
6
यीसू बानै केयो, “मैं ई रा, सच्चाई अर जीवन हूं। मेरै बिना कोई बी पिता कनै कोनी जा सकै।
7
जे थे मनै सच्च में जाण लेवंता तो मेरै पिता नै बी जाणता पण अब थे बिनै जाणो हो, अर बिनै देख्यो बी है।”
8
फिलिप्पुस बिनै केयो, “हे प्रभु म्हानै पिता दिखा दे अर म्हारै खातर इतो भोत है।”
9
यीसू बिनै केयो, “फिलिप्पुस, मैं इतै लम्बै टेम ऊं तेरै सागै हूं अर अजे तांई तूं मनै कोनी जाणै है। तूं पिता नै देख लियो है, फेर तूं किंया केवै है म्हानै पिता दिखा दे।
10
के तनै बिस्वास कोनी है कै मैं पिता में रेऊं हूं अर पिता मेरै में रेवै है? ऐ बातां झिकी मैं थानै केऊं हूं। आपगै कनै ऊं कोनी केऊं, पण मेरै में रेण आळो पिता आपगा काम मेरै द्वारा करै है।
11
मेरै उपर बिस्वास करो कै मैं पिता में रेऊं अर पिता मेरै में है। अर जे आ नई तो मेरै द्वारा करेड़ा काम देखगे मेरै पर बिस्वास करो।
12
मैं थानै साची साची केऊं हूं झिका काम मैं करूं हूं मेरै उपर बिस्वास करण आळो बी बे काम करैगो। मैं पिता गै कनै जाऊं हूं सच्च में बो आं कामा ऊं बी मोटा काम करैगो।
13
झिका मेरै उपर भरोसो राखगे कीं मांगोगा तो बो ई मैं करूं क्यूंकै मेरै द्वारा पिता नै आदर मिलै।
14
जे थे मेरै पर भरोसो राखगे कीं मांगोगा तो मैं बिंयाई दे दैयूंगा।
15
जे थे मेरूं प्रेम करो तो मेरी आग्या नै मानोगा।
16
मैं पिता ऊं बिनती करूंगा अर बो थानै मदद करण आळो देवैगो झिको थारै सागै सदां रेवैगो।
17
बो मदद करण आळो सच्चाई गो आत्मा है। ईं दुनिया में बिनै कोई कोनी मानै। क्यूंकै ईं दुनिया में बिनै देख्यो कोनी अर जाण्यो बी कोनी। थे बिनै जाणो हो क्यूंकै बो थारै सागै रेवै है अर आ'गै बी थारै सागै रेवैगो।
18
मैं थानै अनाथ कोनी छोडूंगा अर मैं थारै कनै आऊं हूं।
19
थोड़ी देर गै बाद संसार गै लोगां नै मैं कोनी दिखूंगा पण थे मनै देखोगा अर मैं जींवंतो हूं। ईंखातर थे बी जींवता रेवोगा।
20
जद थे जाणोगा कै मैं पिता में रेऊं हूं अर थे मेरै में रेवो हो अर मैं थारै में रेऊं हूं।
21
झिका मेरी आग्या नै मानगे बिंगै उपर चालै है बे मेरूं प्रेम करै है। झिका मनै प्रेम करै है बानै मेरो पिता बी प्रेम करै है। अर मैं बी बिंऊं प्रेम करूंगा। अर मैं अपणै आपनै बिं पर परगट करूंगा।”
22
यहूदा झिको इस्करियोति यहूदा कोनी, दूसरो यहूदा हो, बण केयो कै, “हे प्रभु आ किंया गी बात है कै तूं म्हानै बतावै है अर दुनिया गै लोगां नै कोनी बतावै।”
23
यीसू उतर दियो, “जे कोई मेरूं प्रेम करै है तो बो मेरै बचन गो पालण करैगो अर बिनै पिता परमेसर बी प्रेम करैगो अर म्हे बिंगै कनै आवांगा। अर बिंगै सागै रेवांगा।
24
झिको मेरूं प्रेम कोनी राखै बो मेरो बचन कोनी मानै अर झिको बचन थे सुणो हो, बो मेरो कोनी पण पिता परमेसर गो है झिकै मनै भेज्यो है।
25
ऐ बाता मैं थानै जद कैई ही जद मैं थारै सागै हो।
26
पण मदद करण आळी पवितर आत्मा झिको पिता मेरै नाम ऊं भेजैगो बा थानै सारो कीं बतावैगो अर झिको मैं थानै केयो है बो थानै याद करावैगो।
27
मैं थानै आपगी सांती देगे जाऊं हूं। मैं आप थानै आपगी सांती देऊं हूं। जिंया संसार सांती देवै है बिंया कोनी देऊं। थारो मन दुखी ना होवै अर ना डरै।
28
थे मनै केवंता सुण्यो है कै मैं जाऊं हूं अर थारै कनै फेर आऊंगा। जे थे मेरूं प्रेम करता तो राजी होवंता कै मैं पिता परमेसर कनै जाऊं हूं। क्यूंकै पिता मेरूं मोटो है।
29
आ बात होण ऊं पेलां ई मैं थानै के दियो। क्यूंकै जद बो हो जावै तो थे बिस्वास करो।
30
मनै अब थारै ऊं जादा बाता करण खातर बोळो टेम कोनी है क्यूंकै दुनिया गो राजा, सैतान आवै है। बिंगो मेरै उपर कोई अधिकार कोनी है।
31
पण जिंया पिता मनै आग्या दी, बिंयाई मैं करूं जिंऊं दुनिया आळा जाणै है कै मैं पिता ऊं प्रेम करूं हूं। अब अठुं उठो, आपां चाला।”
Bagri Bible 2023
2023 (Active), Wycliffe Bible Translators, Inc. WIn Publishing Trust
:
Save Notes