थे मेरै में रेवो अर मैं थारै में रेऊंगा। जे डाळी अंगूरा गी बेल सागै जुड़गे कोनी रेवै तो फळ कोनी ल्या सकै बिंयाई जे थे बी मेरै में ना जुड़गे रेया तो फळ कोनी ल्या सको।
अब ऊं मैं थानै दास कोनी केऊंगा क्यूंकै कोई दास कोनी जाणै कै बिंगो मालिक के करै है। पण मैं थानै मित्र केयो है क्यूंकै मैं झिकी बाता आपगै पिता कनूं सुणी, बे सारी थानै बता दी।
अर थे मनै कोनी चुण्यो पण मैं थानै चुण्या है अर जिमेदारी दी है। क्यूंकै थे जा'गे झिका आच्छा काम मैं करया बिंयाई कर'गे आच्छो फळ ल्यावो अर थारो फळ बण्यो रेवै। थे मेरै नाम ऊं पिता कनूं झिको मांगोगा बो मिल जावैगो।”
अर जे थे बेर राखण आळा बरगा होवंता तो बे थारूं प्रेम करता क्यूंकै थे बी पेलां बांगै जिसा काम करता। पण अब थे संसार गा कोनी हो। मैं थानै ईं संसार मू चुण लिया है। ईंखातर बे थारूं बेर राखै है।
मैं थानै केयो है कै कोई दास आपगै मालिक ऊं मोटो कोनी होवै। बिं बात नै याद करो, जे बां मनै दुख दियो तो थानै बी दुख देवैगा। बिंयाई जे बां मेरी बात मानी तो थारी बात बी मानैगा।
जे मैं ईं संसार में ना आवंतो अर बानै परमेसर गी बाता ना सिखावंतो तो बे कीं बात गा दोसी ना होवंता। पण अब आपगै पापां खातर बांगै कनै कोई बचणै गो तरिको कोनी है।
जे मैं बांगै बिचाळै चमत्कार गा काम ना करतो झिका चमत्कार कदी कणी कोनी करया तो बे पापां गा दोसी ना होवंता। पण अब तो बां मेरै द्वारा करेड़ा चमत्कार देख लिया है फेर बी मेरै अर मेरै पिता दोनां ऊं बेर राखै है।