N yɛri ya la dimbɔŋɔnim’ ni di saha ti paai ka yi teei ni n daa pun yɛli ya di yɛla.” “N daa bi pun yɛli ya dimbɔŋɔnima piligu ni, ka di nyɛla n ni daa na be yi san’ la zuɣu.
Amaa yɛlimaŋli ka n yɛri ya, yi sɔŋbu zuɣu, di niŋ kamaata ni n lab’ ŋun tim ma na maa sani, dama n yi bi labi, Sɔŋda la ku ka yi sanna; amaa n yi labi, n ni tim o yi sanna.
Naawuni Shi’ so ni yɛlimaŋli ni bela yi ti kana, o ni wuhi ya yɛlimaŋli zaa soli; dama o bi ti yɛn yɛli shɛli omaŋmaŋ’ yiko ni, amaa o ni wum shɛlikam, dina ka o ti yɛn zaŋ yɛli, ka ni ti wuhi ya binshɛŋa din ti yɛn niŋ.
Ka o nyaandoliba maa ni shɛb’ bɔhiri taba, “Yɛtɔɣ’ bɔ ka o lee tɔɣisiri ti yɛri ni di kpalim biɛla ka ti ku lan nya o; ka di ti tooi biɛla ka ti lan nya o yaha maa; ka lan yɛri ni dama o labirila o Ba sani?”
Ka Yisa daa baŋ bɛ ni bɔri ni bɛ bɔh’ o shɛm ka bɔhi ba, “N ni yɛli ni di kpari biɛla ka yi ku lan nya ma, ka di ti tooi biɛla ka yi lan nya ma maa gbinni ka yi bɔhiri taba ni yi baŋ maa?
Achiikatim, yɛlimaŋli ka n yɛri ya, yi ni ti kum ka fabili, amaa ka dunianim’ bɛn’ suhuri ti piɛla; yi suhuri ni ti saɣim, amaa yi suhusaɣiŋgu maa ni ti leei suhupiɛlli.
Paɣ’ yi wolisiri ni o dɔɣi, o malila suhusaɣiŋgu o biɛrim nyabu saha ni paai zuɣu; amaa o yi ti dɔɣi bia maa naai, o bi lan teer’ o biɛrim maa yɛla yaha, o ni dɔɣi bia dunia ni maa zuɣu.
“Dindali maa mi yi ti ku bɔhi binshɛli yɛla n sani. Achiikatim, yɛlimaŋli ka n yɛri ya, yi yi ti zaŋ n yuli suhi binshɛɣukam m Ba sani, o ni tin ya li.