Ne y'o koo fɔ aw ye janko, n'a waati mana se, aw hakili ka jigi a la ko ne tun y'o fɔ aw ye ka kɔrɔ. Ne ma kɔn k'o fɔ aw ye kabini a daminɛ, bari ne tun be n'aw ye.
Nii Senuman min be Ala ka tiɲɛ yira mɔgɔw la, n'ale nana tuma min na, a ben'a to aw be tiɲɛ bɛɛ lɔn, bari a tena kuma a yɛrɛ barika la. Nga a mana fɛɛn o fɛɛn mɛn, ani koo min bɛɛ bena kɛ, a bena o fɔ aw ye fana.
A ka kalanden dɔw tun be ɲɔgɔn ɲininga ko: «A tun b'a fɛ ka mun le fɔ an ye? Ko yanni waati dɔɔni an ten'a ye, o kɔ waati dɔɔni tugu an bena tila k'a ye. A ko tugu ko ale be ta'a Faa fɛ.»
Yezu tun y'a lɔn k'u b'a fɛ k'ale ɲininga minkɛ, a y'a fɔ u ye ko: «Aw be ɲɔgɔn ɲiningana ne ka kuma le kɔrɔ la wa? Ne y'a fɔ minkɛ ko yanni waati dɔɔni aw tena ne ye, ani ko yanni waati dɔɔni tugu aw bena ne ye.
Tiɲɛ tiɲɛ na, ne b'a fɔ aw ye ko, aw bena kasi fɔɔ ka kɛ makaritɔw ye, k'a sɔrɔ diɲɛ mɔgɔw be nisɔndiya la. Aw dusu bena kasi nga, aw ka dusukasi bena yɛlɛma ka kɛ nisɔndiya ye.
Ni muso be jigira deen na tuma min na, a nii be tɔɔrɔ, bari a ka tɔɔrɔwaati le sera, nga n'a jigira ka ban, a hakili te to o tɔɔrɔ la tugu deen sɔrɔ nisɔndiya fɛ.
Ne y'o fɔ aw ye janko aw ka to ni ne ye ka hɛrɛ sɔrɔ. K'aw to diɲɛ na, dusukasi le be aw kan, nga aw k'aw jaa gwɛlɛya, ne ye see sɔrɔ diɲɛ kan ka ban.»