लेकिन यो बात मैंले येक कारण तुमूनथैं क्योछ, कि जब उनोरो पुरो हुना को बखत आ जालो तैं तुमून याद जौ, कि मैंले तुमूनथैं पैलि भटे कै राखछ्यो, जब तुम शुरू में म्यारा शिष्य बन छ्या, मैंले इन बात तुमून शुरूवाद में येक कारण नै क्यो क्याखिनकि मैं तुमार दगाड़ छयूँ।
फिरले मैं तुमूनथैं सच्ची कुछूँ, कि म्यारा जान तुमून खिन निको छै, क्याखिनकि अगर मैं नी जूलो, त उ मद्दगार तुमार पास नै आलो, और अगर मैं जूलो त उ मद्दगार तुमार पास भेजोलो।
लेकिन जब उ मतलब सत्य को आत्मा आलो, जो पवित्र आत्मा छै, उ परमेश्वरा का बारिमें सत्य प्रगट करछो, क्याखिनकि उ अपून अधिकार ले नै कलौ, लेकिन जो कुछ परमेश्वरा का तरफ भटे सुणोलो, उई कलौ, और ऊँन वाली बातुन तुमून बतालो।
तब यीशुका थ्वाड़ा शिष्य आपस में कुंनान, “यो कि बात छै, जो उ हमून थैं कुंछो, ‘थ्वाड़ा देर में तुम मैंस नी देखला, और फिर थ्वाड़ा देर में तुम मैंस देखला?’ और यो ‘येक कारण कि मैं पिता परमेश्वरा का पास जाछूँ’?”
मैं तुमूनथैं सच्ची-सच्ची कुछूँ; कि तुम म्यारा मरना का बाद तुम रोला और विलाप करला, लेकिन संसार का लोग खुशी मनाला, तुमून दुख होलो, लेकिन जब मैं मरिनान में भटे दुबारा ज्यून हो भेरन वापस ऊँलो, तुमोरो दुख खुशी में बदल जालो।
जब स्यैनि बच्चा स जन्म दीन बखत उछो, त उ भौत तखलीफ में हुछी। क्याखिनकि उको दुखो को बखत आ जाछो, लेकिन जब उ बच्चा जन्म दी दीछी, त यो खुशी में कि संसार में एक आदिमी पैद भ्योछ, येक कारण उ स्यैनि उ तखलीफ स भूल जाछी।
उ बखत जब मैं तुमून फिर देखलो तब तुम मैंथैं के नी पूछला; मैं तुमूनथैं सच्ची-सच्ची कुछूँ, अगर पिता थैं कै माँगला त उ म्यारा शिष्य हुना का नाता ले तुमून द्योलो।
मैंले यो बात तुमूनथैं उदारण में क्योछ, लेकिन अब उ बखत ऊँन मरियोछ, कि मैं तुमूनथैं उदारणुन में और फिर नी कुँलो, लेकिन खुलभेरन तुमून पिता का बारिमें बतुलो।
क्याखिनकि पिता परमेश्वर त खुद तुमूनथैं प्रेम राखछो, येका कारण कि तुमून ले मैंथैं प्रेम राखछा, और यो विश्वास करछ्य, कि मैं पिता परमेश्वर में का तरफ भटे आरयूँ।
अब हम जाण ग्या, कि तैं सब कुछ जाण छै, और तैंस कैकी जरूरत नाहतिन कि कोई तैथैं सवाल पुछोलो, येमें हम विश्वास करनू, कि तैं परमेश्वरा का तरफ भटे आईना को छै।”
देखा, उ बखत उछो, बल्कि आई ग्योछ कि तुम सब तितर-बितर हो भेरन अपून-अपून बाटा हो ल्याला, और मैंस ऐकलो छोड़ देला, फिरले उले मैंस ऐकलो नै छोड़ियो; क्याखिनकि पिता परमेश्वर म्यारा दगाड़ छै।
मैंले यो बात तुमूनथैं येक कारण क्यान, कि तुम म्यारा शिष्य छा शान्ति मिलो। लेकिन हिम्मत राखा, क्याखिनकि मैंले यो संसारा का अधिकारी मतलब शैतान स हरा दीछ।”