Kambe nimibzelile timhaka leti lesvaku loko nkarhi wa kuhumelela ka tona wufika, mitatsundzuka lesvaku nivulavulile hi tona ka n'wina. “Animibzelanga svilo lesvi kusunguleni, hikuva anahali na n'wina.
Hambi svilitano, namibzela ntiyiso: Svitava svinene ka n'wina loko nifamba. Hikuva loko ningafambi, Muchaveleli angakala angati ka n'wina; kambe loko nifamba, nitamurhumela ata ka n'wina.
Van'wana xikarhi ka vajondzisiwa va yena vavutisana, vaku: “Xana avula yini, loko aku ka hina: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke? Nilesvi ange: ‘Hikuva niya ka Tatana’ ke?”
Yesu asvitivile lesvaku valava kumuvutisa, kutani aku ka vona: “Xana mivutisana hi letoyini xikarhi ka n'wina? Xana hi lesvi ningate: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke?
Loko wansati aveleka, atwa kuvava lokukulu, hikuva nkarhi wa yena wufikile; kambe loko avelekile n'wana, warivala maxangu ya yena hikolaho ka kutsaka, hi lesvi kungavelekiwa munhu misaveni.
Svitano na n'wina: Mitwa kuvaviseka svosvi, kambe nitatlhela nimivona, kutani timbilu ta n'wina titatsaka, kutani aku na munhu lweyi angatamitekela kutsaka ka n'wina.
“Nimibzelile timhaka leti hi kuvulavula hi svifaniso; kambe nkarhi wata, lowu ningataka ningahavulavuli na n'wina hi mukhuva lowu; kambe nitamibzela sva Tatana rivaleni ningarhendzeleki.
Vonani, nkarhi wata, ni svosvi wufikile, lowu mingatahangalaka ha wona, mun'wana ni mun'wana atlhelela kaya ka yena, minisiya nilinoxe; hambi svilitano aninoxe, hikuva Tatana ana mina.