Kua jei ma yawe, Jesús jowaɨwa ara kotɨ umae jare jei: “CheRu mii, uwäe ma ara che amano waerä,” jei. “Añawe kua mbae asata aï wae rupi, ikuaaka mii che ndeRaɨrä aiko wae cheree tuichaete ye ko wae. Jayawe chepuereta aikuaaka nderee tuichaete ye ko wi,” jei.
“Jare ¿mbae ra jokua tekowe opa mbae? Nde ko jae pëtiño Tumpa añetete wae, jare che ko jae Jesucristo nde chembou wae. Tayandekuaa reta. Jokua ko jae tekowe opa mbae wae,” jei.
“Kua cheremimboe mii reta, nde nemee ma chewe ɨwɨ pewa reta ipɨte wi. Jae reta nembae ko, jare nde nemee chewe reta wi,” jei. “Añawe che amɨmbeu kawi ma chupe reta nde rewa, jare jae reta uyapo ma nde ndere wae.
Jae nunga wi che amɨmbeu kawi ma chupe reta niñee nde nemee chewe wae, jare jae reta wɨrowia ma jese. Añawe ramo jae reta uikuaa jokua ñee ndewi etei ko ou wae. Uikuaa kawi reta che ndewi ko ayu wae, jare wɨrowia reta ma nde ko chembou wae,” jei.
“Erëi añawe, cheRu mii, che a yeta ma aï ndepɨ. Jare ayerure aï ndewe kua mbaembae re cheremimboe reta jowai, jukuärái jae reta uyerowiaete oï waerä che ayerowia rami,” jei.
“Che añeñono tee ma amano waerä jese reta. Jare jukuärái jae reta ipuereta uñeñono tee nemaerä añetete rewe,” jei. “Añawe che amondo aï kua reta opaete ɨwɨ rupi kërái nde chembou ɨwɨ pe rami,” jei.
“Che aikota pëti ramiño jae reta ndiwe, jare nde pëti ramiño che ndiwe. Tuiko reta wi pëti ramiño. Echa’ä ɨwɨ pewa reta uecha yawe kërái jae reta pëti ramiño ñonoï, jayawe ramo uikuaata reta nde ko chembou wae. Jare uikuaata reta wi nde ndeau ko cheré wɨrowia wae reta kërái nde cherau rami,” jei.
“CheRu mii, ndei ɨwɨ uyeyapo mbowe, nde cherauño mái jare nemee chewe mbaepuere jupiete ye wae. Jare che aipota jokua kía nunga nde nemee chewe wae reta yureko waerä che ndiwe kiape che aikota wae pe. Echa’ä che aipota jae reta uecha waerä chembaepuere jupiete ye wae,” jei.
“Che aikuaaka ma chupe reta nde rewa, jare jekuaeño che ayapota jukuärái jae reta cherau waerä kërái nde cherau rami. Jare jukuärái che etei aïta jae reta ndiwe. Jukuärái ko ayerure ndewe,” jei Jesús.