Afta Jizɔs dɔn pre dɔn, in ɛn in lanin bɔy dɛn kɔmɔt na di ples we dɛn bin de, dɛn krɔs wan watasay we dɛn kɔl Kidrɔn. Dɛn go insay wan gadin we bin lib de.
So Judas go mit Jizɔs ɛn di ɔda lanin bɔy dɛn na di gadin. I go wit sɔm Roman soja man dɛn ɛn sɔm pan dɛn pipul we bin de gyad Gɔd in Os. Na dɛn bigman we de mek sakrifays fɔ pipul sin ɛn di Faresi dɛn sɛn di gyad dɛn go wit Judas. Dɛn bin ol lamp, faya tik layt, ɛn tin fɔ tek fɛt.
Saymɔn Pita ɛn wan ɔda lanin bɔy bin de go wit Jizɔs. Di edman fɔ dɛn man we de mek sakrifays fɔ pipul sin bin no di ɔda lanin bɔy gud, so di lanin bɔy fala Jizɔs go insay di yad we bin de na di edman in os.
Bɔt Saymɔn Pita bin lɛf na do klos di get. Di ɔda lanin bɔy, we bin go insay wit Jizɔs, kɔmɔt na do bak, i tɔk to wan titi we bin tinap na di get, ɛn mek Pita kam insay di yad.
Di ples bin so kɔl, dat di bɔy dɛn ɛn di gyad dɛn mek faya wit kol, dɔn dɛn go tinap rawnd di faya fɔ wam dɛnsɛf. So Saymɔn Pita go tinap wit dɛn fɔ wam insɛf na di faya.
Jizɔs ansa am se, “Na bifo ɔlman a kin tɔk, ɛn na dɛn Ju mitin os ɛn Gɔd in Os, we ɔlman kin gɛda, a kin lan pipul. A nɔ ayd fɔ tɛl ɛnibɔdi ɛnitin wande.
Jizɔs ansa se, “If a tɔk ɛnitin we nɔ rayt, tɛl ɔlman we de na ya di tin we a tɔk we nɔ rayt. Bɔt if a rayt fɔ tɔk di tin we a tɔk, wetindu yu slap mi?”
Saymɔn Pita bin stil de klos di faya de wam in bɔdi. Di ɔda pipul dɛn we bin de wam dɛn bɔdi aks am se, “Yusɛf nɔto wan pan da man de in lanin bɔy dɛn?” Saymɔn Pita se, “Nɔ-o, mi nɔto in lanin bɔy!”
Wan bɔy we bin de wok to di edman fɔ dɛn man we de mek sakrifays fɔ pipul sin we bin fambul to di man we Pita bin kɔt in yes kɔmɔt, se, “Nɔto yu a si wit am insay di gadin?”
Ali mɔnin di gyad dɛn go pul Jizɔs na Kaye fas in os kɛr am go na di gɔvnain os. Di Ju bigman dɛn nɔ go insay di gɔvnain os, bikɔs dɛn Ju Lɔ se if dɛn go insay os we pipul we nɔto Ju tap, dɛn nɔ go klin na Gɔd yay, ɛn dat go mek dɛn nɔ fit fɔ it pan di it we dɛn mek fɔ di Pasova.
Jizɔs se, “Mi nɔto Kiŋ na dis wɔl, if mi na bin Kiŋ na dis wɔl, dɛn pipul we de fala mi bin fɔ fɛt fɔ mi mek pipul nɔ briŋ mi kam bifo di Ju bigman dɛn fɔ mek dɛn jɔj mi. Mi nɔto Kiŋ na dis wɔl.”