Kana vo phendias kudala dieli, o Jesus gelotar peske vortakonsa pe e kaver rig katar o paiořo o Kedron, kai si jekh kimpo garado, ande savo vo dias andre, vo ai peske vortača.
O Simon Petri, lesa jekh kaver vortako, gelo pala o Jesus. Kudo vortako prinžiardias les o baro rašai, ai vo dias le Jesusosa ande o kimpo garado le bare rašasko;
numa o Petri bešlo avri paša o vudar. O kaver vortako, kai žianelas les o baro rašai, anklisto avri, delas duma ka e sluganka, ai kerdias te del andre o Petri.
O Jesus del les palpale: Me dem duma puterdes ka e lumia; me sakda sikiardem ande le khangeria židovitsko ai ande o templo, kai sa le Židovuri kjidenas pe, ai me či phendem khanči garades.
Von ningerde le Jesus katar o Kaifas ka e vladoreski avlin. Sas diminiatsa. Či dine von andre ande o kher, eta te na mahrin pe, ai te šai te xan e Patradi.
Muři amperetsia nai ande kadia lumia, del palpale o Jesus. T'avilinosas muři amperetsia anda kadia lumia, muře služi sas te maren pe pala mande eta te na avav dino ande o vast ka le Židovuri; numa akana muři amperetsia nai kathe tele.
O Pilato phenel leske: Kadia tu san amperato? O Jesus del palpale: Tu phenes, me sim amperato. Me arakhadilem ai me avilem ande e lumia te sikavav so si o čačimos. Kon-godi si ande o čačimos ašunel muřo hango.
O Pilato phenel leske: So si o čačimos? Pala ke phendias kudia, vo mai anklisto avri te žial karing le Židovuri, ai vo phenel lenge: Me či arakhav či jekh nasul ande leste.