Theihthai beizy nata hyutuhpazy ta Zisu ama hmôpa nahta, “Khaipâ teh, Khaipâ teh!” tahpa ta awh ei ta. Pilâ ta ama hnohta, “Nâmo ta a chhi u la, khaipâ teh u, kei la thailei a châna khâpa hmah hmô va na,” tah ta.
Zisu ta a chhy ta, “Chô lâ tawhta biehneina piepa na châ vei khiahta la, ei chô liata khâpa biehneina hmah hnei va chi. Chavâta nâ lâta nâ vaw hlâtuhpa moleina he a lai via,” tah ta.
Cha khai tawhta, Pilâ ta Zisu cha pathlie a chhuah ta. Châhrasala Zuzy ta, “He chyhsa he na pathlie khiahta la, Kaisarâ viasa châ va chi. Âmosasyh ta bei ta â taopa maih Kaisarâ amâ dyuh tyh,” tah ei ta.
Âmo ta, “Pahleipadia teh, pahleipadia teh, khaipâ teh!” tahpa ta awh ei ta. Pilâ ta ama hnohta, “Nama Beipa he ei khaipâ aw ma?” tah ta. Theihthai beizy ta a chhy ei ta, “Kaisarâ leipa ta bei hropa hnei ma pi,” tah ei ta.
Zisu khaipâna su cha khihpi kiapâh châ ta, châropa cha Hebrai reih, Rawma reih nata Krikâh reihzy ta ropa a châpa vâta, Zu chyhsa hluhpi ta reih thei ei ta.
Pheisaihzy ta Zisu cha ama khaipâ khai nahta, a chysiazy la ei ta, su palih ta pachhaih ei ta, pheisaih pakha ta su kha chyu a la ei ta. A viahkao rytho chhao la ei ta. Viahkao rytho cha bieh leipa, a pawhmao tawhta a chhâna taihta a sa ta sapa a châ.
Chavâta, “Hrie khah ei suh u, ahy ma a to aw tahpa nuby tlao a dao ei suh u,” tah ei ta. Biehrai ta, “Ei chysiazy a rai ei ta, Ei viahkao châta nuby amâ dao,” a tahpa kha a â ki thei nawpa ta, he hmo he a vaw tlôpa a châ.
Pachynoh châ ta, rizy cha Pahânoh ta kraws liata y thlâh awpa a châ leipa vâta, cha Pahânoh cha noh rônahpa châ tlôh ta, Zuzy ta Pilâ hnohta ama pheizy thliepa ta, ama ri cha la ha awpa ta a haw ei ta.
Cha hmo cha, mo ta a hmôtuhpa cheingei ta a reipa a châ. A hmo pahnopa cha a do ta, biedopa a reihpa a châ tahpa chhao ano liata â pahno. Cha bie cha nâmo chhao ta namâ ngiapâ thei nawpa ta reipa a châ.
Cha hmozy hnôhlâ ta, Arimathai khihpa Zawsi ta Zisu ri cha la awpa ta Pilâ hiah ta, Pilâ ta pasai ta. Zawsi cha Zisu pachupa pakha châ hra ta, Zuzy a chipa vâta arulâta ngiapâtuhpa a châ. A vy ta, a ri cha la ta.