Yennu jɑɑnti yudɑnm nɑn b sejenm nbɑ lɑ’u nɑ, k b tiɑn tintiɑni, k yɑɑ ɑ: «Kpɑɑn’mɔ dɑpunpunn pɑɑk. Kpɑɑn’mɔ dɑpunpunn pɑɑk.» K Piilɑɑt yet’b ɑ: «Yinm jii’mɔ mɑn k kpɑɑ’u dɑpunpunn pɑɑk i mɔnŋ, k mɑɑn min k lɑ u biit.»
K Yiesu ji jiin’ɔ ɑ: «Yennu i bo i kii cɑb’ɑ yiikuo, ɑ bo kii mɔk n yiikuo. L pɑɑk, dɑɑnɔ nbɑ suol’n k jiin kubn’ɑ nɑ, u biit yɑb bonciɑnn k gɑl ɑ yɑl ɑ.»
L yuo k ji sɑɑ, Piilɑɑt din yiɑb luon wun ŋɑɑ Yiesu, ŋɑɑn k Suifnbɑ yudɑnm nɑ yɑki kpɑyɑkt k yɑɑ ɑ: «L i tie k ɑ ŋɑɑ’u, ŋɑnn ɑ ji k tie Luonm kpɑnbɑlɑ yudɑɑnɔ Sesɑɑl yuɑk kɑɑ, k mɑɑn dɑɑnɔ nbɑ pul u mɔnŋ Kpɑnbɑl, u tie kpɑnbɑlɑ yudɑɑnɔ nɑ dɑtɑɑk e.»
K b yɑki kpɑyɑkt k yɑɑ ɑ: «Kpin’mɔ. Kpin’mɔ. Kpɑɑn’mɔ dɑpunpunn pɑɑk.» K Piilɑɑt boi’b: «I luon k n kpɑɑ i Kpɑnbɑl dɑpunpunn pɑɑk ii?» K Yennu jɑɑnti yudɑnm nɑ jiin ɑ: «T k mɔk kpɑnbɑlsuɑ sie Luonm kpɑnbɑlɑ yudɑɑnɔ Sesɑɑl kuukuɑ.»
Lenŋ e k b kpɑɑ’u dɑpunpunn pɑɑk, k biɑ kpɑɑ niib bɑnle dɑpunpunɑ pɑɑk k pukn Yiesu po, k yenɔ be u ciɑnu k luɑ mun be u ciɑnu, ŋɑɑn k Yiesu be sinsuuk ni.
K Suifnbɑ bonciɑnn din lii diɑni mɑnŋ ɑ, k mɑɑn siɑn nbɑ k b din kpɑɑ Yiesu dɑpunpunn pɑɑk nɑ, l din k fɔk nɑn Selusɑɑlenm. Diɑni nɑ, l din diɑn Suifnbɑ nɑn Luonm tieb nɑn Glek tieb mɑɑn ni e.
Sejenm nbɑ kpɑɑ Yiesu nɑ puolpo e, k b jii u tiɑt k cent’l tɑɑl munnɑ, k sejenm nɑ kul din gɑɑl tol. L puolpo e biɑk k b jii u liɑtfuouk, lin nbɑ k b luu’l bonmunn, k l k mɔk nyɑlmu nɑ,
k b yet b lieb ɑ: «I dɑɑ pɑt. Ŋɑɑnt k t tɔ tiɑtiɑ k lɑɑn wun nbɑ sɑɑ yent’l.» L din tien nnɑ, ɑ Yennu lolkpel kɑdɑɑɔk nbɑ din yet nnɑ, lin ji fit gbie ɑ: «B cent n tiɑt, k biɑ tɔ tiɑtiɑ n liɑtfuouk pɑɑk.» Nnɑ e k sejenm nɑ set din tun.
L puolpo e, Yiesu din mi nɑn bonsiɑl kul nbɑ k u din tuun nɑ, l ji gbenn ɑ, k u yet ɑ: «Nyun-nyuklu mɔk’n,» ɑ lin gbien lin nbɑ diɑn Yennu lolkpel kɑdɑɑɔk ni nɑ.
L din tie ɑlsumɑ dɑɑl e, k Suifnbɑ din k luon niib nɑ i be dɑpunpunɑ pɑɑk *Fuondɑɑl, k mɑɑn Fuondɑɑl mɑnŋ din tie dɑjɑɑnn e. Ŋɑnn e k b din boi Piilɑɑt ɑ wun cɑb’b k bin kɔnn kɔnn b tɑɑ k kpɑɑt’b.
L puolpo e k Suosiɑf, wun nbɑ tie Aliimɑɑte nilɔ nɑ, sɑɑn Piilɑɑt buol ni, k sɑɑ miɑl’ɔ Yiesu gbɑnɑnt. Suosiɑf din tie Yiesu puolpoweituɑ e, ŋɑɑn u din wɑɑ’u wuol ni e, k mɑɑn u din tiin Suifnbɑ yudɑnm e jɑŋmɑɑni. K Piilɑɑt cɑb’ɔ, k u sɑɑn k sɑɑ kpɑɑt Yiesu k jii’u.
K Niikodenm mun bɑɑl, wun nbɑ din ponŋ mi k bɑɑl Yiesu penŋ nyiɑɔk nɑ, k diɑ tulɑɑli k l tie nɑn cilu piintɑ nɑ. (B din jii bonsiɑl nbɑ k b yi’l miil nɑn bonsiɑl nbɑ k b yi’l ɑlos k ŋmɑt k tien tulɑɑli mɑnŋ.)