O be don ni sagaw ye daa min fɛ dugu kɔnɔ, o gɛrɛfɛ, jii lɔyɔrɔ dɔ tun be yen, o b'o yɔrɔ nin wele eburukan na ko Bɛtizata. O y'a yɔrɔ nin lɔ ka bulonda duuru kɛ a la.
Bari tuma dɔ, Matigi ka mɛlɛkɛ dɔ tun be jigi ka jii lamaga. Ni banabagatɔ min kɔnna ka jigi jii la a lamaganin kɔ, o tigi be kɛnɛya, hali n'a ka bana tun be cogo o cogo.]
A y'a jaabi ko: «Matigi, mɔgɔ te n fɛ n'a be n ta ka n jigi jii la a magamagawaati la. Sanni ne b'a fɔ ko n be dɛmɛdɛmɛ ka jigi, dɔ be kɔn ka jigi ne ɲa.»
O kɔ, Yezu ye cɛɛ kunbɛn Alabatosoba kɔnɔ, a y'a fɔ a ye ko: «Ayiwa, i kɛnɛyara sisan, i kana kojugu wɛrɛ kɛ tugu waasa o sara kana juguya ni fɔlɔta ye.»
O kama, zuwifuw tun b'a ɲini jagoya la janko k'a faga. Lafiɲɛlon batobaliya dama tun t'a kuun ye. Nga u ko a be Ala wele ko a Faa, ani ko a b'a yɛrɛ suma ni Ala ye.
O la, Yezu ye kuma ta k'a fɔ u ye ko: «Tiɲɛ tiɲɛ na, ne b'a fɔ aw ye ko Deen te se ka foyi kɛ a yɛrɛ ma. A b'a Faa ka kɛta le filɛ. Ni Faa ye fɛɛn o fɛɛn kɛ, Deen fana b'o ɲɔgɔn kɛ.
Tiɲɛ tiɲɛ na, ne b'a fɔ aw ye ko ni mɔgɔ min ye n ka kuma lamɛn ka la n cibaga la, o tigi ye nii banbali sɔrɔ. A tena kiti, a niin bɔra saya la ka don hɛrɛ la ka ban.
Ne te se ka foyi kɛ n yɛrɛ ma. Ne be min mɛn, ne be kiti tigɛ ka kɛɲɛ n'o le ye. Ne ka kiti fana tilennin lo. Bari ne te n yɛrɛ sago kɛra fɔɔ ne cibaga sago.»