|
| 1 |
|
| अ बाता होबा क क्युंक दिना पाछै, ईसु गलिल झिल जिनै तिबरिआस बी खेवै ह, क परली पार चलेगो। |
|
| 2 |
|
| अर मिनखा की भीड़ बिकै गेल होरी ही क्युं क बे बा चमत्कारानै देख्या हा, जाकै जरिए बो रोगलानै निरोगो कर्यो हो। |
|
| 3 |
|
| जणा ईसु डूँगरी प चढर आपका चेला क सागै बठै बेठगो। |
|
| 4 |
|
| यहूदि मिनखा को फसै को त्युंहार आबाळो हो। |
|
| 5 |
|
| अर जद ईसु नजर घूमार बि घणीसारी भीड़नै आपकै कनै आती देख्यो। जणा फलिपूसऊँ बोल्यो, “आपा आ ताँई रोटी कठैऊँ मोल ल्यावां?” |
|
| 6 |
|
| आ बात ईसु बस फलिपूसनै बिचासबा ताँई बुज्यो हो। क्युं क असल म ईसु जाणतो हो क काँई करनो ह। |
|
| 7 |
|
| फलिपूस बोल्यो, “आपा दो सो चाँदी का सीक्का की बी रोट्या ल्यावां जणा कम पड़सी। अर बे अत्ता मिनखा म थोड़ी-थोड़ी बी पाँती कोनी आवै।” |
|
| 8 |
|
| ईसु को एकोर चेलो अंदरिआस जखो समोन को भाई हो ईसुऊँ बोल्यो, |
|
| 9 |
|
| “अठै एक छोरो ह जिकै कनै जौवां की पाच रोट्या अर दो मछी ह। पण अत्ता मिनखा म अ कठै लागै?” |
|
| 10 |
|
| ईसु बोल्यो, “मिनखानै बिठा द्यो।” बठै बोळी घास ही जणा बे बठै बेठगा। अर बामै करीब पाच झार तो मोट्यार-मोट्यार हा। |
|
| 11 |
|
| जणा ईसु रोटी ली अर परमेसरनै धनेवाद देर जखा बेठ्या हा बा मिनखा म जत्ती बे चावा हा बाट दि। अर अंय्यांई बो मछी ली अर धनेवाद देर बाट दि। |
|
| 12 |
|
| जद बे सगळा खार धापगा, जणा ईसु आपका चेलानै बोल्यो, “बचेड़ी रोटी भेळी करल्यो, जिऊँ क्युंई बेकार नइ जावै।” |
|
| 13 |
|
| जणा बे भेळो कर्या अर पाच जौवां की रोटीऊँ बचेड़ी रोटी का बारा चोल्या भेळा होया। |
|
| 14 |
|
| मिनख ईसु का इ चमत्कारनै देखर बोल्या, “सचमई ओ बोई परमेसर की खेबाळो ह, जखो जगत म आबाळो हो।” |
|
| 15 |
|
| जणा ईसु आ भापर क बे बिनै ठडाईऊँ राजा बणाबा ताँई लेज्याबा आर्या हीं, जणा बो ऐकलोई डूँगरी प चलेगो। |
|
| 16 |
|
| जद दिन आथगो जणा बिका चेला झिल क किनारै गया, |
|
| 17 |
|
| अर अँधेरो होगो हो पण हाल ताँई ईसु बाकन कोनी आयो हो। जणा बे न्याव प चढर झिल क परली पार कफरनूम कानि रवानगी करी। |
|
| 18 |
|
| जोरकी आँधी की बजेऊँ झिल म झाल उठबा लागी। |
|
| 19 |
|
| अर जद बे दोएक कोस चलेगा हा जणा बे ईसुनै पाणी प चालता, अर न्याव क कनै आता देख्या, अर बे डरग्या। |
|
| 20 |
|
| पण बो बाऊँ बोल्यो, “डरो मना, म हूँ।” |
|
| 21 |
|
| जणा बे बिनै राजी मनऊँ जंय्यांई न्याव म चढाया, चढाताई न्याव किनारा पुगगी। |
|
| 22 |
|
| आगलै दिन झिल क उरलै नाकै जखी भीड़ रेह्गी ही, बानै ओ बेरो पड़्यो क बठै एक न्याव ही। अर ओ बी बेरो पड़्यो क ईसु चेला क सागै बि न्याव प कोनी चढ्यो। पण चेला बिकै बिनाई चलेगा। |
|
| 23 |
|
| जणा तिबरिआस नगरीऊँ क्युंक न्यावा बि झघा आई, जठै परबु क धनेवाद देबा क पाछै मिनख रोटी खाई ही। |
|
| 24 |
|
| जद भीड़ आ देखी क नइ तो बठै ईसु ह अर नइ बिका चेला जणा बे सगळा बा न्यावा म चढर ईसुनै ढुंढता-ढुंढता कफरनूम आ पुग्या। |
|
| 25 |
|
| अर जद बे बिनै झिल क परली पार देख्या, जणा बिऊँ बोल्या, “गरूजी, थे अठै कद आया?” |
|
| 26 |
|
| ईसु बाऊँ बोल्यो, “म थानै सची खेऊँ हूँ, थे मेरा चमत्कारा की बजेऊँ मेरै गेल कोनी आया। पण म थानै धपार रोटी खुवाई, इ ताँई थे मेरै गेल आया हो। |
|
| 27 |
|
| रोट्या ताँई मेनत मना करो क्युं क बे तो बुसज्यावै, पण अजर-अमर जीवन देबाळी रोटी ताँई मेनत करो। आ बा रोटी ह जखी मिनख को बेटो थानै देसी, क्युं क परम-पिता परमेसर बिनै ओ अधिकार दिओ ह।” |
|
| 28 |
|
| जणा बे बिऊँ बोल्या, “परमेसर जखो चावै ह, बो करबा ताँई म्हें काँई करां?” |
|
| 29 |
|
| ईसु जुबाब म बाऊँ बोल्यो, “परमेसर चावै ह क, जिनै बो भेज्यो ह, बिपै थे बिस्वास करो।” |
|
| 30 |
|
| जणा बे बिऊँ बोल्या, “म्हानै चमत्कार दिखा जिनै देखर म्हें तेरै प बिस्वास करां। तू काँई कर सकै ह? |
|
| 31 |
|
| म्हारा बडका उजाड़ म मन्नो खाया, जंय्यां क पबितर सास्तर म मंडेड़ो ह, ‘बो बाकै खाबा ताँई आसमानऊँ रोटी बरसाई।’ ” |
|
| 32 |
|
| जणा ईसु बाऊँ बोल्यो, “म थारूँ सची बोलुँ हूँ, ईस्बर नगरीऊँ रोटी देबाळो मूसा कोनी हो। पण बो मेरो परम-पिता ह जखो ईस्बर नगरीऊँ थानै सची रोटी देवै ह। |
|
| 33 |
|
| जखी रोटी परमेसर देवै ह, बा ईस्बर नगरीऊँ उतरी ह, अर बा जगत का मिनखानै जीवन देवै ह।” |
|
| 34 |
|
| जणा बे बिऊँ बोल्या, “म्हराज थे आ रोटी म्हानै सदाई दिआ करो।” |
|
| 35 |
|
| ईसु बाऊँ बोल्यो, “जीवन की रोटी म हूँ। जखो मेरै कनै आसी बो भूखो कोनी रेह्सी, अर बो जखो मेर प बिस्वास करसी कदैई तिसायो कोनी मरसी। |
|
| 36 |
|
| पण जंय्यां क थानै ओबी खयो हो, थे मनै देखलिआ हो, पण हाल ताँई मेर प बिस्वास कोनी करो। |
|
| 37 |
|
| जोक्यु परम-पिता मनै देवै ह, बो मेरै कनै आसी अर म बिऊँ मुंडो कोनी फेरूं। |
|
| 38 |
|
| क्युं क म मेरी इंछ्या नइ पण मनै भेजबाळा की इंछ्यानै पूरी करबा ताँई ईस्बर नगरीऊँ धरती प उतर्यो हूँ। |
|
| 39 |
|
| अर जखो मनै भेज्यो ह, बिकी इंछ्या आ ह क जोक्यु बो मनै दिओ ह बिमैऊँ क्युंई नइ खोऊँ। पण आखरी दिन म बानै जीवाऊँ। |
|
| 40 |
|
| क्युं क मेरा परम-पिता की इंछ्या आ ह क जखो बी बेटानै देखै ह। अर बिपै बिस्वास ल्यावै ह बिनै अजर-अमर जीवन मिलै, अर आखरी दिन म खुद बिनै जीवा देस्युँ।” |
|
| 41 |
|
| जणा यहूदि बिपै बल्डाबा लाग्या, क्युं क बो बोल्यो हो क, “जखी रोटी ईस्बर नगरीऊँ उतरी ह बा म हूँ।” |
|
| 42 |
|
| अर बोलबा लाग्या, “ओ युसूफ को छोरो ईसु कोनी के, जिका माँ-बापनै आपा जाणा हां? जणा इब ओ कंय्यां खे सकै ह क, ‘म ईस्बर नगरीऊँ उतर्यो हूँ?’” |
|
| 43 |
|
| ईसु जुबाब म बोल्यो, “आपसरी म मना बल्डाओ। |
|
| 44 |
|
| मेरै कनै कोई कोनी आ सकै। जद ताँई क मेरो परम-पिता जखो मनै भेज्यो ह बो बिनै मेरै कनै नइ ल्यावै, अर आखरी दिन म बिनै जिंदो कर देस्युँ। |
|
| 45 |
|
| परमेसर की खेबाळा पबितर सास्तर म आ मांडी ह, ‘सगळानै परमेसरई सीखासी।’ अर मेरै कनै बोई आवै ह जखो परम-पिताऊँ सुणै अर सीखै ह। |
|
| 46 |
|
| पण जखो परमेसर कानिऊँ आवै ह बोई परम-पितानै देख्यो ह बिकै अलावा कोई कोनी देख्यो। |
|
| 47 |
|
| “म थारूँ सची बोलुँ हूँ, जखो मेर प बिस्वास करै ह, अजर-अमर जीवन बि ताँई ह। |
|
| 48 |
|
| जीवन की रोटी म हूँ। |
|
| 49 |
|
| थारा बडका उजाड़ म मन्नो खाया, बिकै पाछै बी बे मरगा। |
|
| 50 |
|
| पण आ बा रोटी ह जखी परमेसर ईस्बर नगरीऊँ उतारी, जखो बी इ रोटी मऊँ खासी बो कोनी मरसी। |
|
| 51 |
|
| बा जीवती रोटी म हूँ जखी ईस्बर नगरीऊँ उतरी। जखो बी इ रोटीनै खासी बो सदाई जिंदो रेह्सी। अर इ जगत का मिनखानै जीबा ताँई जखी रोटी म देस्युँ, बो मेरो मास ह।” |
|
| 52 |
|
| इ बात प यहूदि आपसरी म आ खेर जिरै करबा लाग्या, “ओ मिनख आपानै आपको मास खाबा ताँई कंय्यां दे सकै ह?” |
|
| 53 |
|
| ईसु बाऊँ बोल्यो, “म थारूँ सची बोलुँ हूँ, जद ताँई थे मिनख का बेटा को मास कोनी खाल्यो अर बिको लोय कोनी पील्यो, थारै म जीवन कोनी आ सकै। |
|
| 54 |
|
| जखो बी मेरो मास खावै अर मेरो लोय पिवै अजर-अमर जीवन बिको ह। अर आखरी दिन, म बिनै जीवास्युं। |
|
| 55 |
|
| क्युं क मेरो मास सची रोटी अर मेरो लोय सची पीबा की चिज ह। |
|
| 56 |
|
| जखो मिनख मेरो मास खावै अर मेरो लोय पिवै बो मेरै म अर म बिमै बण्यो रेह्ऊँ हूँ। |
|
| 57 |
|
| जंय्यां जीवतो परम-पिता मनै भेज्यो ह, अर मेरा परम-पिता की बजेऊँ म जिंदो हूँ। ठिक बंय्यांई जखो मेरी काया खासी, बो बी मेरी बजेऊँ जिंदो रेह्सी। |
|
| 58 |
|
| जखी रोटी ईस्बर नगरीऊँ उतरी ह, बा आई ह। आ बि मन्ना की जंय्यां कोनी, जिनै थारा बडका खाया अर मरगा, पण जखो बी आ रोटी खासी बो सदाई जिंदो रेह्सी।” |
|
| 59 |
|
| अ बाता बो कफरनूम म अरदास करबाळी झघा म सीखाई। |
|
| 60 |
|
| बिका घणकराक चेला आ सुणर बोल्या, “आ कल्डी सीख ह। इपै कूण चाल सकै ह?” |
|
| 61 |
|
| ईसु आपका मन म आ भापर क मेरा चेला आपसरी म इ बात प बल्डावै ह, जणा बाऊँ बुज्यो, “आ बात थानै बुरी लागी के? |
|
| 62 |
|
| जणा थे काँई करस्यो जद थे मिनख का बेटानै आसमान म उपर जाता देखस्यो, जठै बो पेली हो? |
|
| 63 |
|
| परमेसर की आत्मा तो जीवन देवै ह, पण मिनख की ताकत ख्याई काम की कोनी। जखी बात म थारूँ खई ह, बे परमेसर की आत्माऊँ ह अर जीवन देवै ह। |
|
| 64 |
|
| पण थारै मऊँ क्युंक अंय्यां का हीं जखा बिस्वास कोनी करीं।” क्युं क ईसु सरूआतऊँई बानै जाणतो हो, जखा बिस्वास कोनी करीं अर बो कूण ह जखो बिनै धोकाऊँ पकड़ासी। |
|
| 65 |
|
| अर बो बोल्यो, “जणाई तो म थारूँ बोल्यो हो क, जद ताँई खुद परम-पिता कोईनै मेरै कनै आबा कोनी देवै, जद ताँई कोई मेरै कनै कोनी आ सकै।” |
|
| 66 |
|
| इ बात की बजेऊँ बिका चेला मऊँ बोळाजणा बिकै पिछै चालबो छोड दिआ। |
|
| 67 |
|
| जणा ईसु बा बाराऊँ बोल्यो, “थे बी जाबो चाओ हो के?” |
|
| 68 |
|
| समोन पतरस बिनै जुबाब दिओ, “परबु, म्हें किकै कनै जावां? अजर-अमर जीवन देबाळी बाता तो तेरैई कनै ह। |
|
| 69 |
|
| अर म्हें बिस्वास कर्यो अर जाणगा हां क थेई परमेसर का पबितर मिनख हो।” |
|
| 70 |
|
| ईसु बाऊँ बोल्यो, “म थानै बारवांनै कोनी टाळ्यो के? इकै बावजुद थारै मांयनै एक जणो सेतान ह।” |
|
| 71 |
|
| आ बात बो समोन इस्करोती का बेटा यहूदा क बारां म बोली ही, क्युं क बा बारा मऊँ बोई बिनै धोकाऊँ पकड़ाबाळो हो। |
|
|
|
|