तिनीहरूले उहाँलाई घरीघरी सोधिरहे। त्यसैले येशूले तिनीहरूलाई हेरेर भन्नुभयो, “जसले कहिल्यै पाप गरेको छैन, त्यसले नै सबैभन्दा पहिले यो स्त्रीलाई ढुङ्गाले हानोस्।”
यो कुरा सुनेर तिनीहरू एक-एक गर्दै त्यहाँबाट हिँडे। पहिले बुढापाकाहरू गए। आखिरमा येशू मात्र छोडिनुभयो अनि त्यो स्त्री येशूको सामुन्ने उभिइरहेकी थिई।
फेरि येशूले मानिसहरूलाई सिकाउँदै भन्नुभयो, “संसारको ज्योति मै हुँ। मेरो पछि लाग्नेले कहिल्यै पनि अँध्यारोमा हिँड्नुपर्नेछैन कारण उसले जीवन दिने उज्यालो पाउनेछ।”
येशूले भन्नुभयो, “मैले मेरो बारेमा साक्षी दिए पनि मैले भनेको कुरा साँचो छ किनभने म कहाँबाट आएको हुँ अनि कहाँ जाँदै छु, त्यो मलाई थाहा छ। तर तिमीहरूलाई चाहिँ यो कुरा थाहा छैन।
त्यतिखेर तिनीहरूले सोधे, “तपाईंका पिता कहाँ हुनुहुन्छ त?” येशूले भन्नुभयो, “तिमीहरू न मलाई नता मेरो पितालाई नै चिन्दछौ। यदि तिमीहरूले मलाई चिनेको भए मेरो पितालाई पनि चिन्नेथियौ।”
फेरि पनि येशूले तिनीहरूलाई भन्नुभयो, “म यहाँबाट गइहाल्नेछु। तिमीहरूले मलाई खोज्नेछौ, तर तिमीहरू आफ्नै पापमा मर्नेछौ किनभने म जाने ठाउँमा तिमीहरू आउन सक्दैनौ।”
यो सुनेर यहूदी अगुवाहरूले आपसमा भने, “यो के भनेको हो? ऊ जहाँ जान्छ, त्यहाँ हामी पुग्न सक्दैनौं भन्छ! यसले आत्महत्या गर्न आँटेको हो कि क्या हो?”
त्यसैले मैले ‘तिमीहरू आफ्नै पापमा मर्नेछौ’ भनेको हुँ। यदि तिमीहरूले ‘म जो हुँ त्यही हुँ’ भनी मलाई विश्वास गरेनौ भने तिमीहरू आफ्नै पापमा नाश हुनेछौ।”
तिमीहरूको बारेमा मैले भन्नुपर्ने र न्याय गर्नुपर्ने कुरा त धेरै छन् तर मलाई पठाउनुहुने सत्य हुनुहुन्छ। उहाँबाट सुनेको कुरा मात्रै म संसारलाई सुनाउन चाहन्छु।”
त्यति बेला येशूले तिनीहरूलाई भन्नुभयो, “तिमीहरूले म मानव पुत्रलाई काठमा टाँगेर उचालेपछि ‘म जो हुँ त्यही नै हुँ’ भन्ने तिमीहरूले थाहा पाउनेछौ। म आफ्नै खुसीले केही पनि गर्दिनँ, तर पिताले मलाई सिकाउनुभएका कुराहरू मात्र गर्छु भन्ने कुरा पनि तिमीहरूले जान्नेछौ।
तिनीहरूले भने, “हाम्रा पिता त अब्राहाम नै हुन्!” येशूले भन्नुभयो, “साँच्चै अब्राहामका सन्तान हुँदा हौ त तिमीहरूले अब्राहामले गरेजस्तै काम गर्ने थियौ।
तिमीहरू जसका छोराहरू हौ, त्यस्तै काम गर्दै छौ।” तिनीहरूले भने, “हामीचाहिँ व्यभिचारबाट जन्मेका होइनौं। परमेश्वर नै हाम्रा एक मात्र पिता हुनुहुन्छ।”
येशूले भन्नुभयो, “साँच्चै तिमीहरूका पिता परमेश्वर हुनुभएको भए तिमीहरूले मलाई प्रेम गर्नेथियौ किनभने म परमेश्वरको तर्फबाट आएको हुँ। म आफ्नै तर्फबाट आएको होइनँ, परमेश्वरले नै मलाई पठाउनुभएको हो।
तिमीहरू आफ्नै बुबा शैतानका सन्तान हौ र तिमीहरू आफ्ना पिताले भनेअनुसार गर्न तयार छौ। त्यो त सुरुदेखि नै ज्यानमारा हो, त्यो त सत्यमा कहिल्यै पनि टिक्न सक्दैन किनभने त्यसमा सत्य नै छैन। आफ्नो स्वभावअनुसार त्यसले त सधैँ झूट बोल्छ। त्यसैले त्यो त झूट बोल्नेहरूकै पिता हो।
यहूदी अगुवाहरूले भने, “पक्का तँलाई त भूत नै चढेको रहेछ। अब्राहाम मरे, अगमवक्ताहरू पनि मरे, तँचाहिँ ‘मैले भनेको मान्नेले कहिल्यै पनि मर्नुपर्दैन’ भन्छस्!
येशूले भन्नुभयो, “मैले आफ्नै आदर खोजेको भए त्यो खोक्रो आदर हुनेथियो। तर मेरो आदर गर्नुहुनेचाहिँ मेरा पिता हुनुहुन्छ, उही पिता, जसलाई तिमीहरूले आफ्ना परमेश्वर भनेर भन्छौ।
तर तिमीहरूले उहाँलाई चिनेका छैनौ। मचाहिँ उहाँलाई राम्ररी चिन्छु। यदि मैले उहाँलाई चिन्दिनँ भनेको भए म पनि तिमीहरूजस्तै झूटो ठहरिने थिएँ। तर म उहाँलाई चिन्छु र उहाँले भन्नुभएको कुरालाई मान्छु।