×

Biblia Ande Chib Romani 2018

Skutki 1

1
Ande mo purvo lil, glamno Teofilo, pisisardem katar sa so cherda ta sa so sikada o Jesus sar kana lia te cherel pi buchi
2
llik kai o llive kana llelo ando miloso. Ta mai anglal te llaltar, o Santo Duo cherda te phenel so saia te cheren e apostolura kai vou esvirisardaia.
3
Ta kana o Jesus ustilo katar o meripe sikadilo lenge, ta gia dikhle kai chachimaia saia llundo. Ta saranda llive sikadilo lenge ta dela lenge orba katar e charoina e Devleki.
4
Ta kana saia e apostolenchar, o Jesus phenda lenge: Na llantar katar o Jerusalem. Mai sukar aduricharen te cherdol o alav kai mo Dad dia tumen ta kai me phendemle tumenge.
5
Chachimaia o Juan kristisarda e paiea, a nesave llivesa mai angle, tumen ka aven kristime e Santone Duoia.
6
E llene kai sea chidine e Jesusea puchle le: Gazda, ¿Ka lachare ande gava vreme e charoina katar o Israel?
7
O Jesus phenda lenge: Inai tumenge te llanen o llive ni o vreme kai o Dad thoda ande po gazdaripe.
8
A kana o Santo Duo ka avel upral pe tumende, ka len zor ta ka llan te den mi orba ando Jerusalem, ande sa o Juda ta e Samaria, ta pe thana kai si mai dur pe phuv.
9
Ta kana phenda gala alava, von dikhle sar vazdinailo ando miloso ta iek oblako ucharda le ta ni dikhle le pale.
10
Ta kana dikhena ando miloso sar o Jesus duriola, dui llene furiade ando parnipe avile pasa lende
11
ta phende lenge: Galileura, ¿soke dikhen upre? Isto gava Jesus kai saia maskar tumende ta inllardilo ando miloso, ka avel pale isto gia sar dikhlen le kai llaltar.
12
E apostolura irisaile katar o burdo e Maslinkengo ando Jerusalem. Ni phirde but, phirde so mukel len o zakono te phiren ando sabado.
13
Kana avile ando foro, llele ande soba kai chinadea upral po cher. Von sea o Pedro, o Juan, o Santiago, o Andres, o Felipe, o Tomas, o Bartolome, o Mateo, o Santiago chavo e Alfeoko, o Simono o Selote, ta o Judas chavo e Santiagoko.
14
Sa von chidiniaona suako drom te molinpe nesave diskinienchar, e Mariaia e dei e Jesuseki, ta leke phlalenchar.
15
Ande gola llivesa o Pedro dia orba e phlalenchar kai sea chidine. Von sea preko stotina ta bis llene, ta phenda lenge:
16
Phlalalen, saia te cherdol so si pisime, kana o Santo Duo dia orba katar o mui e Davideko kana phenda katar o Judas, gua kai inllarda gole llenen kai phangle e Jesuse.
17
Soke o Judas saia iek amarendar, ta radila amenchar.
18
A llelo ta chinda iek umal e lovenchar kai die le pala leko bilachipe kai cherda. Mapalal pelotar e sorea ta pharrlo, ta likiste sa leke porra.
19
Kana llangle gua e llene kai zivina ando Jerusalem, thode o anav gole umaliako Aseldama, kai ande lengi chib si: O than e rateko.
20
Soke ando lil katar e Salmura phenel: Te achel pusto leko cher, ta te na zivil niko andre. Ta i phenel: Te lel leko rado aver lleno.
21
Si llene kate kai sea amenchar sa o vreme kana o Gazda o Jesus saia maskar amende,
22
sar kana kristisarda le o Juan llik kana llelotar ando miloso. Goleke, iek lendar trubul te avel amenchar ta te phenel kai o Jesus ustilo katar o meripe.
23
Ondaka phende te aven dui: O Jose, kai phenena leke Barsabas ta i phenena leke Chacho, ta o Matias.
24
Ta molisaile gia: Gazda, tu kai pinllare sa amare lie, phen amenge save katar gala dui esvirisardan
25
te lel o rado kai o apostol o Judas jasarda pala po bilachipe, kana llelotar kai o than kai saia prema le.
26
Ondaka cheldepe te dikhen ko ka achel, ta achilo o Matias, kotar angle llinde le e desuiekhe apostolenchar.
Romani Ursari Bible 2018
Biblia ande chib Romani Sociedad Bíblica Chilena, 2018
:
Save Notes