E be e le motho wa borapedi e a boifago Modimo, yena le ba lapeng la gabo ka moka. O be a fela a hlallela badiidi dineo tša kgaugelo, a rapela Modimo ka mehla.
Koronelio a mo lebelela a swerwe ke go boifa, a re: Ke eng, Morena? Morongwa a re: Merapelo ya gago le ditlhallelo tša gago tša kgaugelo di fihlile tša tsebja ke Modimo.
Ya re Petro a sa eleletšwa se pono yeo a e bonego e ka bago sona, ke ge banna bala ba go rongwa ke Koronelio ba eme mathuding ba botšiša ngwako wa Simone.
Banna bao ba re: Koronelio tona ya bahlabani, monna wa go loka le go boifa Modimo, wa tumo e botse setšhabeng sa Bajuda, o laetšwe ke Morongwa e mokgethwa, a thwe a go bitše o tle ngwakong wa gagwe, a kwe ditaba go wena.
Petro a ba iša ka ngwakong, ya ba baeng ba gagwe. Ka moswana Petro a tsoga a sepela le bona. Le ba bangwe ba bana babo ba tumelo ba motse wa Jope ba ya nae.
A bolela le bona a re: Le a tseba; monna wa Mojuda ga go a mo swanela ge a ka kopana le motho wa mohuta o šele, le go tla ga gagwe. Ge e le nna, Modimo o ntšhupeditše gore ke se ke ka re: go ya go motho e mongwe go a ila, ke se ke ka re ke wa ditšhila.
Koronelio a fetola a re: Maloba ke be ke ikonne dijo matšatši a mane. Nako ya senyane ge e fihla, ke ge ke rapela fa ngwakong wa ka. Ka bona monna wa diaparo tše di phadimago a eme pele gaka;
Bjale roma motho a ye Jope, a bitše Simone a e reilwego la Petro, e lego moeng ngwakong wa Simone wa mošogi, o lego hleng ga lewatle. Yena eo, ge a tlile, o tlo go botša.
Nna ka roma batho e sa le semeetseng, ba tla go wena. Gomme o dirile gabotse ge o tlile. Bjale re phuthegetše fa pele ga Modimo, gore re kwe tšohle tše Modimo a go laetšego tšona.
Ke taba ya Jesu wa Natsaretha, yo Modimo a mo tloditšego ka Moyamokgethwa le ka maatla, a tšama a šetša batho, a fodiša bohle ba go katakelwa ke Diabolo gobane Modimo o be a na le yena.
E se be go bonwa ke setšhaba ka moka; a bonwa ke dihlatse tše di bego di hlaotšwe ke Modimo, ke rena ba re llego le yena, ra nwa le yena a sa tšo tsoga bahung.