“N daa bela Jɔpa n-suhiri Naawuni, ka Naawuni ti chɛ ka n nya binshɛli din kɔtomsi be kaman adiiku tital’ la ʒii puuni, ka di yi zuɣusaa sirigiri n sanna.
Ka Naawuni Shia Kasi daa yɛli ma ni n doli ba chaŋ ka di chɛ ka n suhu zɔhira. Ka m mabih’ ayɔbu ŋɔ gba daa doli ma chaŋ, ka ti daa mali ti kpe doo maa yiŋa.
Yisa nyaandol’ shɛb’ bɛn daa wurim bɛ nahiŋgu din daa doli Stiivin kubu nyaaŋa la zuɣu daa chaŋ hal ni Fɔnisia mini Saipurus ni Antiɔk. Bɛ daa mali Naawuni yɛligu n-tɔɣisirila Yɛhudianim’ kɔŋko.
Ka bɛ ni shɛb’ bɛn mi daa yi Saipurus mini Sairiini n-ka Antiɔk na mali Naawuni yɛtɔɣa n-tɔɣisirila Yɛhudianim’ bɛn wumdi Giriikili, ka yihiri ba ti Duuma Yisa yɛla waazu.
O ni daa ti paai nimaani n-nya Naawuni daalibarika tuma, di daa niŋ o nyaɣisim pam, ka o kpam bɛ zaa jaande ni bɛ kul ʒe yim Naawuni sani, ka di birigi.
O ni daa ti nya o, ka o zaŋ o lab’ Antiɔk. Ka bɛ daa be nimaani Yisa nyaandoliba sani yuun’ muni zaa n-wuhiri niriba pam Naawuni yɛligu. Antiɔk maa ka bɛ daa tuui boli Yisa nyaandoliba “Kristiɛnnima”.
Ka bɛ ni yino ŋun yuli daa booni Agabus daa ti yiɣisi zani n-yɛli Naawuni Shia Kasi yiko ni ni kum ni lu pam dunia zaa ni; ka di daa ti shiri niŋ pali Naa Klɔdius nam dibu saha.