1
Apostolkuéra ha Juda pegua hermanokuéra ohendúma tetã ambueyguakuéra apytépe oĩmaha avei umi ojeroviáva Hesu Crísto rehe.
2
Ha umi Jerusalengua omomba’eitéva pe pire’i ñekytĩ’o (circuncision) oñoñe’ẽapi Pédro ndive, og̃uahẽ jevy vove Jerusalénpe,
3
ha oporandu hikuái Pédrope: Ma’erã piko nde reike kuimba’e oñekytĩ’o’ỹva rógape ha rekaru hendivekuéra.
4
Pédro katu omombe’u porãmba hekoitépe ichupekuéra opaite mba’e ojehu hagueichaite ha he’i:
5
Che añembo’e jave pe táva Jópepe, ojehechauka chéve techapay (vision rupi) peteĩ mba’e savanáicha oguejýva yvágagui. Oñeñapytĩva irundy ijapýragui ha oñembojavahína che rendápe.
6
Ha ama’ẽ porãvo ipype rehe ahecha opaichagua mymba ipy irundýva, mymba otyryrýva yvýre, mymba iñarõva ha guyra ára rehe ovevéva.
7
Ha ahendu peteĩ oñe’ẽva chéve he’ívo: Pédro epu’ã, ejuka ha he’u.
8
Che katu ha’e: Mba’evéicharõ che Jára, araka’eve ndoikeiva’ekue che jurúpe koichagua mymba ro’o ipotĩ’ỹva ha Ñanderuete omboykeukamava’ekue oje’u’ỹ hag̃ua.
9
Ha pe ñe’ẽ oúva yvágagui he’i jevy chéve: Umi mba’e pende Ruete omopotĩmava’ekue rehe ani nde ere hese iky’aha.
10
Upéicha ojehu mbohapy jevy, ha upéi ojehupipa jevy yvágape.
11
Ha upevovete og̃uahẽ mbohapy kuimba’e pe óga aĩha renondépe, oñemboúva che rendápe Cesaréagui.
12
Upérõ pe Pytu Porãmbáva he’i chéve aha hag̃ua hendivekuéra py’aheta’ỹre. Oho avei chendive ko’ã 6 hermáno, ha ore roike upe kuimba’e rógape.
13
Ha Cornélio omombe’u oréve ohecha hague sapy’a peteĩ ángel oñembo’ýva ikotýpe ha he’íva ichupe: Emondo Jópepe, ha ehenoiuka Simónpe, oñembohérava avei Pédro.
14
Ha’e omombe’úta ndéve pe tekove rape ñe’ẽ, nde ha nde rogayguakuéra ojesalva hag̃ua.
15
Ha añepyrũvo añe’ẽ ho’a hi’arikuéra pe Pytu Porãmbáva, ho’a haguéicha avei ñepyrũme ñandeári.
16
Upéramo chemandu’a Hesu Crísto ñe’ẽ rehe, he’iva’ekue: Juan ningo oporobautiza ýpe, peẽ katu pebautizáta Pytu Porãmbávape.
17
Péicha ningo Ñanderuete ome’ẽ ichupekuéra avei pe me’ẽmby ome’ẽ haguéicha ñandéve, jajerovia ramoguare Ñandejára Hesu Crísto rehe, ha mávapa che, añemoĩ hag̃ua Ñanderuete rehe.
18
Ha ohendupávo ko’ã mba’e ko’ãva, okirirĩmba hikuái ha noñoñe’ẽapisevéima Pédro ndive, omomba’eguasu uvei Ñanderuetépe, he’ívo: Ko’ág̃a jaikuaa porãma Ñanderuete ohechaukamaha avei tetã ambueyguakuérape ko tekove rape ha oipota ojevy avei hikuái hendápe.
19
Ha umi hermanokuéra oñemosarambiva’ekue ojepersegui haguére Estéban jejuka arakuérape oho Fenícia, Chípre ha Antioquía, Síria pegua peve. Ha’ekuéra katu omombe’únte Judayguakuérape Hesu Crísto evangélio (marandu porã).
20
Ijapytépe oĩ Judayguakuéra onaceva’ekue Chípre ha Cirénepe, ko’ãva katu omombe’u avei tetã ambueyguakuérape Hesu Crísto evangélio Antioquíape.
21
Ha Ñanderuete pu’aka oĩ hendivekuéra ha hetaite oĩ ojeroviáva Hesu Crísto rehe.
22
Jerusalen pegua Iglésia ohendúvo péva, omondo Bernabépe Antioquía, Síria peguápe.
23
Kóva ohechávo Ñanderuete ohovasa porãha pe iglésia rembiapo, horyete ha ojerure asy hermanokuérape ojeroviave hag̃ua ipy’aite guive ohóvo Hesu Crísto rehe.
24
Bernabe ningo peteĩ kuimba’e heko porãva ha henyhẽva Pytu Porãmbáva ha jeroviágui. Heta hetave oĩ oikéva Hesu Crísto iglésiape.
25
Uperire Bernabe oho Társope Sáulo piári,
26
ha ojohúvo ichupe ogueru Sáulope Antioquíape ha mokõivéva opyta peteĩ año pukukue Antioquía iglésiape, ha ombo’e hetápe. Antioquíape raẽ oñehenói ñepyrũ hermanokuérape cristiáno (Hesu Crísto rehe ojeroviágui).
27
Umiha árape og̃uahẽ avei Antioquíape profetakuéra Jerusalen iglésiagui.
28
Ijapytépe peteĩ hermáno Agabo hérava, opu’ã ha oprofetizáva Pytu Porãmbáva rupi oikotaha peteĩ ñembyahýi ndetuichaitéva opaite yvy apére. Ha añetehápe péva ojehu Romaygua ruvichaguasu Cláudio arakuérape.
29
Upévare umi Hesu Crísto reheguáva oikóva Antioquíape omondo pirapire, peteĩteĩ ikatumi háicha oipytyvõ hag̃ua umi Juda departaménto iglesiayguakuérape.
30
Ko pirapire kóva omondo hikuái Sáulo ha Bernabe po rupi umi omyakãva Juda pegua iglesiayguakuérape omboja’o hag̃ua.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015