Ŋɑnn e k Foŋɑnm yet’n ɑ n sɑɑn nɑn’m k dɑɑ bils. K Yiesuweilɑ nbɑ be Sope nɑ, b ni bɑnluob nbɑ be nnɑ nɑ mun ciɑn’n k sɑɑn Sesɑɑle, k t kul ɑ bɑɑl kuɑ Kɔlnɑi ŋɑɑk ni.
Tɔn, l i tie k Yennu set pi’b u Foŋɑnm mɑnŋ nɑn wɑɑ mun din pi tinm nbɑ tien Yonmdɑɑnɔ Yiesu *Klistu yɑdɑ nɑ i e, k ŋɑnn, n tie ŋmee k sɑɑ yet Yennu nbɑ luon wun tun lin nbɑ?»
Bɑɑ din gbɑt nnɑ mɑnŋ yuo nbɑ, k b ji nyik b kpɑyɑkt nɑ, ŋɑɑn donn Yennu sɑnn, k yien ɑ: «Yennu te bin nbɑ k tie Suifnbɑ mun fit mɔ kuɑŋɑɑn k lebt binbenŋ k lɑ mɑnfuol nbɑ kɑɑ gbennu.»
Tɔn, muksuk nbɑ din bɑɑl Etiɑnn kpinu puolpo nɑ din te k Yiesuweilɑ fiil Selusɑɑlenm k yɑt, k b siɑb din yɑɑt k sɑɑn Feniisi, nɑn Siipl, nɑn Antiɑɔs, k din muɑntl Yiesu mɑɑn k tien Suifnbɑ kuukuɑ.
Wɑɑ din sɑɑ bɑɑl lenŋ yuo nbɑ k lɑ Yennu nbɑ tul’b yetŋɑnm biɑnŋ nbɑ, k u lɑ pɑlpienn bonciɑnn, k din cie b pɑlɑ, k kpɑɑn b kul kpɑɑni ɑ bin jii b mɔnŋ k tul Yonmdɑɑnɔ fɑnnu.
Wɑɑ sɑɑ lɑ’u yuo nbɑ k u jen nɑn’ɔ Antiɑɔs, k b din jii binn munn k tɑɑn nɑn Klistu mɔtɑɑɔk niib, k wɑnt niib bonciɑnn Yennu mɑɑn. L din tie Antiɑɔs e k b din sint k pul Yiesuweilɑ ɑ: «Klistuyɑb.»
B yenɔ sɑnn din yi Agɑɑbuus, k Foŋɑnm ni e k u din fiil k set, k yet ɑ kon bonciɑnn tɑn sɑɑ bɑɑ tingbounŋ nɑ kul po, k kon mɑnŋ din set tɑn bɑɑ yuo nbɑ k Kluod din tie kpɑnbɑlɑ yudɑɑnɔ nɑ.
Yuo nbɑ k Yiesuweilɑ din gbɑt ɑ kon yɑɑ lin bɑɑ nɑ, k b din dukn dudukt ɑ b sɑɑ tul sonml, k wun nbɑ fit nyɑnn biɑnŋ nbɑ lek, wun tul Yiesuweilɑ nbɑ be Suude nɑ.