«Mam dag n bee Zope tẽngã pʋgẽ, la mam sẽn wa n pʋʋsdẽ, mam paama vẽnegre. Mam yãnda bũmb sẽn wẽnd wa peen-bedr sẽn yi arzãn n sigd mam nengẽ t'a noy a naasã loe. La a sulgame n pẽneg maam.
Namsg ning sẽn paam tẽedbã a Etɛn kũumã poorẽ wã kɩtame tɩ b sãeeg n kẽng hal Fenisi, la Sɩpr ne Ãntiyoos la b ka moon ned a to Wẽnnaam koɛɛga sã n ka Zʋɩf-rãmbã bal ye.
La yẽnda sẽn ta n yãnd Wẽnnaam sẽn ning tẽedbã bark to-to wã, a sũurã yɩɩ noogo. La a paasa b fãa raood n yet tɩ b kell n tũ Zu-soabã ne b sũyã fãa n da bas ye.
La yẽnda sẽn yãnd a Soll be, a peeg-a lame n wa Ãntiyoose. Bãmb paa be ne a Zeezi tẽedbã yʋʋmd tõre n zãms neb kʋʋngo. Yaa Ãntiyoos la b sɩng n bool a Zeezi karen-biisã tɩ Kiris nebã.
La bãmb ned a yembr yʋʋr sẽn boond t'a Agabuus yikame n togs ne Sɩɩg-sõng pãng tɩ wakat n wat tɩ kom-kãseng na n zĩnd dũniyã tɛk fãa. La komã sɩd zĩnda a rĩm a Sezaar Kolood sẽn wa n dɩt naam wakate.