Antiôkâ Awnanopa sahlaozy hry liata hrohsopazy nata pachutuhpazy y ei ta. Chazy cha Bânabâ zy, Nikâ ama tahpa Simeôna zy, Kurini khihpa Lukia zy, Bei Herawda unawh heihpa Manaina nata Sawla zy ama châ.
Abeipa a chhypa ta kâhvileipa ta ama y hai nota, Thlahpa Pathaihpa ta, “Bânabâ nata Sawla kha âmo ei awna chhâpa rai hria awpa ta na pananopa teh u,” tah ta.
Liahpahlô zydua chahryh ei ta, Pafawsâ khih tlôna taihta sie ei ta. Cha liata dyuthaipa pakha a tyh ei ta, ano cha Zu chyhsa hrohso pakheipa, a moh Barzisu ama tahpa châ ta,
Chavâta tahmâ moh teh, Abeipa ku na chô liata tla ha ta, na mo chao aw ta, daihti khasâ chhôh ma cha noh khaihpa hmô aw va chi,” tah ta. Ameih nata zohna ta thlai vaw khu ta, chaaotuhpa tluapa ta pathâpazi ta.
Pawla nata a sielâhpazy cha Pafawsâ tawhta balyh ta sie ei ta, Pamphulia râh liata Perkâ khih tlô ei ta. Zawhâna cha âmo siesaipa ta Zerusale lâ kua ha ta.
Pawla nata Bânabâ deikua cha Perkâ tawhta sie lymâ ei ta, Pisidia râh liata Antiôkâ khih tlô ei ta. Pahânoh ta pakhyna ozy liata a ngia ei ta, a tyuh ei ta.
Ryhpa châbu nata hrohsopazy châbu tawhta ama rei khai nahta, pakhyna o hyutuhpazy ta âmo lâ chyhsa tuah ei ta, “Unawh saih u, zawpi châta pasyuna bie nama hnei khiahta cha, reih teh u,” tah ei ta.
He Izarei phopi Khazohpa heta miah pathlatuhpazy a tlyh ta, Izi râh liata ama y nona khata phopi rônahpa ta padua ta, cha tawhna chata bâh pazawhpa ta âmo cha chhi papua ta.
Sawla a thy tawhta, Khazohpa ta Dâvi cha ama bei châta padua ta, Khazohpa ta, ‘Zese sawchapawpa Dâvi liata, ei palôh a phaohpa, ei khopa zydua a tao awpa ei hmô haw,’ tah ta.
A raihria a patlô chy ta, Zawhâna ta, ‘Ahy châ aw sah la eina pangiasa ei chi? Ano cha châ va na. Moh teh u, ei hnôhlâ ta chyhsa pakha â vy hai, kei la a pheiky ri a pathlâ tlâh chhao châ va na,’” tah ta.
Zerusale liata a ypazy nata ama ryureituhpazy ta ano cha pahno leipa ei ta, Pahânoh maihta rei tyhpa hrohsopazy bie chhao ama pahno leipa vâta, ano cha thailei pachâsapa ta, hrohsopazy bie ama patlôsapa a châ.
Kâlili râh tawhta Zerusale lâ a hnohta a khy hrapazy hnohta noh hluhpi chhôh a luah ta, tahmâ âmo cha Izare phopi lâta a bie a pahnokheituhpazy ama châ.
Cha bietai cha Khazohpa ta Zisu a pathyuna liata, keimo ama pathlazy liata a vaw tlôpa a châ. Hlazy nuby mianona lia chhao ta, “‘Ei Sawchapawpa châ chi ta, Tanoh he na paw ei châ,’ tahpa ropa a châ.
Athihpa hry tawhta pathyupa ta, thu theipa lâta â lie heih khao lei awpa kyh liata chhao, Khazohpa ta, “‘Dâvi pathaihna nata byhnâzy Ei cha pie aw,’ tah ta.
“‘Nâmo, mohnaotuhpazy saih u, moh teh u, Nama noâh sala, leidia teh u; Nama hro chhôh ta hmo miakha tao na ta, Cha chho hra ei sala, Zo aw veih ei chi,’ tahpa ta a reipa biezy nama chô liata a vaw tlô pathlei aw na,” tah ta.
Pakhyna a pai nahta, Zuzy nata Khazohpa a pachâpa Zu phohlypa hluhpi ta Pawla nata Bânabâ cha zi ei ta, âmo cha bie a chho ei ta, Khazohpa ngiachhiena liata y thlâh ha awpa ta pasyu ei ta.
Pawla nata Bânabâ ta riahpha ngaitapa ta, “Khazohpa bie he nâmo liata rei tua chai awpa tlai châ ta, châhrasala dytha ei chi ta, chhâzaw hrona to tlâh châ lei awpa ta, nâmosasyh ta namâ tao ha hnohkua cha, pachâ teh u, Zenitaizy lâ eimâ heih ha aw.
Cha hawhta tao awpa ta Abeipa ta, “‘Khizaw kaokih chhâna taihta Pachhana tlôkhei awpa ta, Zenitaizy châta khaihna ta ei cha tao aw,’ tahpa ta bie miah a pie,” tah ei ta.
Cha biezy cha Zenitaizy ta ama thei nahta, a ly ngaita ei ta, Khazohpa bie cha parônahsa ei ta; chhâzaw hrona hnei awpa ta raopa hluhpizy cha a ngiapâ ha ei ta.