Ande khanlliri kai si ande Antiokia sea poraukura ta kovacha. Gola llene sea o Bernabe, o Simon kai ikharena le Kalo, o Lusio katar o Sirene, o Menajem kai bariloia e Erodesea, gua kai gazdarisarda ande Galilea ta o Saulo.
Iek llive, kana von blagosina e Devle ta kana allunina, o Santo Duo phenda: Thoven mange pe iek rig e Bernabee ta e Saulo te radin ande buchi kai ikhardem len.
Phirde sa goia isla ta avile ando Pafos, kote malade iekhe llene kai saia judio ta kai saia chirimatarko kai ikhardola Barjesus; vou saia iek kojamno profeta.
O chirimatarko saia amal katar o sudo o Serjio Paulo, iek lleno bizai. O sudo phenda te anen e Bernabee ta e Pedro, soke mangela te asunel e orba e Devleki.
ta phenda leke: ¡Tu san kojamno, bilacho, chavo e llavoloko ta murzi po lachipe! Tu phene kai o Gazda bichalda tut te de leke orbe. Na phen ios gua kojaipe
Akana o Gazda ka thovel tut ande patnia: Ka ache korro nesavo vreme ta nasti ka dikhe o villelo e khameko. Ondaka isto kote o Elimas achilo korro, ta rodela vareka te inllarel le e vastetar soke achilo korro.
O Pablo ta e llene kai llana lea llele katar o Pafos llik kai o Perjes kai achel ande phuv katar e Panfilia, kote o Juan mukla len ta irisailo ando Jerusalem.
Mapalal kana chitisaila o zakono ta o pisipe katar e poraukura, e gazde katar e khanlliri ikharde len ta phende lenge: Phlalalen, te si tumen vareso te phenen te del zor e llenen, phenenle akana.
Ondaka o Pablo ustilo ta cherda lenge e vastea te achen, ta phenda lenge te na den orba: Asunen tumen, israelitura, ta i tumen kai inai sen judiura ta kai daran e Devletar.
O Del katar e Israeleko foro esvirisarda amare puranen ta cherda len iek foro baro kana von zivina ando Ejipto, kote kai ni saia lengi phuv; ta mapalal, pe zoriaia ikanda len katar goia phuv.
Nakhle preko star stotine ta pinda burs, ta ande gola burs nakhle sa gala ezgode. Mapalal o Del bichalda lenge krisaria llik kai e llivesa katar o profeta o Samuel.
Ondaka von mangle iek charo te gazdaril i pe lende, ta o Del dia len saranda burs e charo e Sauleko, chavo e Kiseko kai saia katar e vicha katar o Benjamin.
Mapalal o Del ikanda katar gua than e Saule ta dia len charo e Davide, ta phenda letar: Dikhlem kai o David chavo e Isaieko, si iek lleno kai si ande mi dragostia ta kai mangel te cherel sa so me mangav.
Mai anglal te avel o Jesus, o Juan kai kristil, phenela e poroka sa e foroke katar o Israel, ta phenela lenge kai saia te irinpe kai o Del ta te aven kristime.
Ta kana saia pase o meripe e Juaneko, phenda: Me ni sem gua kai tumen mislin tumen, soke mapalal mandar ka avel iek manus kai me ni sem lacho ni te putarav leke minie.
Soke gola kai zivin ando Jerusalem ta lenge gazde ni pachaie ando Jesus, ta kana von dosarde le, cherde so phenena e poraukura kana chitinpe lenge alava ande khanlliri e judionengi suako sabado.
Ta o Del cherda so phenda kana dia po alav, soke cherda te ustel e Jesuse katar o meripe ta gia avilape sar si pisime ando duito salmo: Tu san mo Chavo; me diem tut o zivoto allive.
O Del phendaia kai ka cherel le te ustel katar o meripe te na murilpe leki esnaga kana phenda ande pe alava: Ka cherav te avenpe e chache ta sante alava kai phendem e Davideke.
Chachimaia o David blazisarda e llenenge ande gola llivesa prema sar phenda leke o Del, ta mapalal mulo ta chidinailo pe puranenchar, ta leki esnaga murisali.
Dikhen, tumen kai maren espurnia, chudin tumen ta nasen; soke ande tumare llivesa ka cherav iek ezgode kai i te phenela la vareko tumenge ni ka pachanle.
Kana o Pablo ta e llene kai llana lea likiste katar e khanlliri e judionengi, mangle lendar o gua sabado kai ka avel te den lenge orba i katar gala ezgode.
Kana getosarde e orba ande khanlliri e judionengi, but judiura ta i llene kai cherdilea judiura llele pala lende ta gale llenenge o Pablo ta o Bernabe phende lenge te na jasaren po pachape ando volipe e Devleko.
Ondaka o Pablo ta o Bernabe, die orba tromanimaia, ta phende lenge: Amen morabi te phena e alava e Devleke mai anglal tumenge, kai sen judiura, a sar tumen ni kamen ta phenen kai ni sen lache te len o zivoto ostade, amen ka lla kai e llene kai inai judiura.
Kana asunde gala orbe, e llene kai inai sea judiura veselisaile ta phende kai e orba e Gazdaki saia lachi, ta pachaie kai lenge sai chinado te avel len o zivoto ostade.
A e judiura die orba nesave diskinienchar kai pachana ta kai e llene dena len liubao, ta die orba i e llenenchar kai sea mai asunde ando foro, ta phende lenge te maren e Pablo ta e Bernabee, te traden len katar gola forura.