Amo man ini ang natabo sa Iconio: Nagkadto si Pablo kag si Bernabe sa sinagoga sang mga Judio kag tungod sang ila pagpanghambal madamo nga mga Judio kag mga Hentil ang nagtuo.
Nagtener didto sing madugay ang mga apostoles. Nagpadayon sila sa pagwali nga may kaisog nahanungod sa Ginoo nga nagpamatuod nga ang ila mensahe nahanungod sa iya daku nga kaayo matuod, paagi sa paghatag sa ila sing gahom sa paghimo sing mga milagro kag katingalahan nga mga buhat.
Dayon nagplano ang iban sang mga Hentil kag ang iban sang mga Judio upod sa ila mga pangulo. Ginkaisahan nila nga sakiton kag batuhon ang mga apostoles.
Samtang nagapungko sia didto nagpamati sia sang mga ginhambal ni Pablo. Nakita ni Pablo nga nagtuo sia kag sarang sia maayo, gani gintulok sia ni Pablo sing tadlong
Sang makita sang mga tawo ang ginhimo ni Pablo, nagsinggit sila sa ila kaugalingon nga linggwahe sa Lacaonia nga nagasiling, “Ang mga dios nanginsubong sang tawo kag nagpanaog sila sa aton!”
Nahamtang sa gwa sang banwa ang templo sang dios nga si Zeus. Ang pari ni Zeus nagdala sang toro nga mga baka kag mga bulak sa pwerta. Kay luyag niya kag sang mga tawo nga dulotan ang mga apostoles sang halad.
“Mga abyan, ngaa bala nga ginahimo ninyo ini? Mga tawo man lang kami nga kaangay ninyo! Yari kami diri sa pagdala sang Maayong Balita agod nga magbiya kamo sining walay pulos nga mga butang kag magbalik sa buhi nga Dios, nga amo ang nagtuga sang langit, duta, dagat, kag sang tanan nga yara sa ila.
Pero nagahatag sia pirme sang pagpamatuod sang iya kaugalingon paagi sa maayo nga mga butang nga iya ginapanghimo: ginahatagan niya kamo sang ulan halin sa langit kag mga patubas sa nagakaigo nga mga tinion. Ginahatagan niya kamo sing pagkaon kag ginapuno niya ang inyo mga tagipusoon sing kalipay.”
May mga Judio nga nag-abot halin sa Antioquia sang Pisidia, kag halin sa Iconio nga naghaylo sa mga tawo sa pagbuylog sa ila. Ginbato nila si Pablo, kag ginsagnoy nila sia pakadto sa gwa sang banwa. Abi nila patay na sia.
Pero sang pagtipon sang mga gintuton-an sa palibot niya, nagbangon sia kag nagbalik sa banwa. Sang madason nga adlaw nagkadto sila ni Bernabe sa Derbe.
Ginwali ni Pablo kag ni Bernabe ang Maayong Balita sa Derbe kag madamo ang ila nadaog nga mangingintuton-an sang Ginoo. Sa tapos sini nagbalik sila sa Listra kag nagpadayon sa Iconio, kag dayon nagkadto sila sa Antioquia sa Pisidia.
Ginpabakod nila ang mga tumoluo kag ginpaisog sila sa pagpadayon sa pagtuo. Sa ila pagpanudlo nagsiling sila, “Madamo nga mga kabudlayan ang aton dapat pagaagihan sa pagsulod sa Ginharian sang Dios.”
Halin didto nagpanakayon sila pabalik sa Antioquia, ang lugar sa diin gintugyan sila sa pag-atipan sang Dios tungod sang bulohaton nga natapos na nila.
Sang pag-abot nila sa Antioquia, gintipon nila ang mga katapo sang iglesia kag ginsugid nila ang tanan nga ginhimo sang Dios paagi sa ila, kag kon paano ang pagbukas sang Dios sang kahigayunan, agod magtuo ang mga Hentil.