Tosubakin na ikote napei nguna alo Ikonio, tolomasi Paulo ka Barinaba kai a Atuk kiruoro a atitinyu sodi tonupa Ngiyaudi lukaalak ka ngibukui lu nyerai Ngiyaudi ngakiro a Akuj.
Kiboikinos ngimeanara inaa nikooyen. Kiruoro a atitinyu ngakiro a Ekapolon alo edodiuni atamar araakasi ngakiro na a ajokis a Akuj eruorosi kesi ngaka iteni ani aanyuneta kesi agogongu na esubeta ngakitoodikinet nakailiilok ka nakitalarete.
Na eirareta ngimeanara ngakiro nguna, tonyout ikirikirasi toloto lorerea a Lusitura ka Deribe, lu eya nakwap a Lukonia ta ngakwapea nache na erikaunito ngina.
Ani eanyungari asepich a ngitunga kangulu na asubakini Paulo, tolomakis achala a ngabukui kech eraakasi Ngalukoniae tamasi, “Ekokis ngakujo ngitunga apot niyok!”
Abu emuron a akuj anasubuna be Seus ana achadakina akai keng nikalapatan a ere, yau ngimongin ka ngatur a ngikito lokidor kainyo asakete ngesi ka ngitunga alemikin ngimeanara ngakipeyos.
“Nyo isubeta esi nu? Kirai sua dang ngitunga loger kus! Kiponit sua nege alimor Ngakiro Naajokak, areeun esi aloborei alu pasiek kalu pot nia Akuj ana eyari, ana kolong asubi adis ka akwap ka anam ta ngiborei daang lu eya nikech.
Pot Ngiyaudi ngiche alore a Antiok alo a akwap a Pisidia ka ere a Ikonio. Kisupa kesi ngitunga kibaka ka kesi. Sodi kimasa kesi Paulo a ngamoru kiriyasi ngesi tochadasi alore ebaasi kori ketoana.
Kitatama Paulo ka Barinaba Ngakiro Naajokak alo Deribe sodi tonupa ngitunga lukaalak ngakiro a Yesu. Ani erumor tobongosi kesi Lusitura ka Ikonio ta lore a Antiok lo eyei nakwap a Pisidia.
Na adolioto kesi Antiok, tochunakis ngitunga a ekanisa daang wapei sodi tolimokis kesi ngakiro daang na asubi Akuj anikech ka eger lo etunupea ngesi ngibukui lu nyerai Ngiyaudi ngakiro a Akuj.