May mga tawo halin sa Judea nga nagkadto sa Antioquia kag nagtudlo sa mga kautoran, “Indi kamo maluwas kon indi kamo magpatuli, suno sa ginatudlo sang Kasugoan ni Moises.”
Mainit ang pagpakigbais ni Pablo kag ni Bernabe batok sa ila nahanungod sini, gani nagpamat-od ang mga kautoran nga palakton si Pablo kag si Bernabe sa Jerusalem nga updan sang iban nga mga taga-Antioquia, agod nga mapakigkitaan nila ang mga apostoles kag mga katigulangan sang iglesia nahanungod sini nga butang.
Ginpalakat sila sang iglesia kag sa ila pag-agi sa Fenicia kag Samaria, nagsugid sila kon paano ang pagliso sang mga Hentil sa Dios. Nalipay gid ang tanan nga mga kautoran tungod sini nga balita.
Sa ila pag-abot sa Jerusalem ginbaton sila sang iglesia kag sang mga apostoles kag sang mga katigulangan. Ginsugid nila ang tanan nga ginhimo sang Dios paagi sa ila.
Pero may pila ka mga tumoluo nga sang una katapo sang partido sang mga Fariseo nga nagtindog kag nagsiling, “Kinahanglan nga tulion ang mga Hentil kag patumanon sang Kasugoan ni Moises.”
Sa tapos sang malawig nga pagbaisay nagtindog si Pedro kag nagsiling, “Mga utod, inyo nahibaluan nga madugay na ako ginpili sang Dios sa pagwali sang Maayong Balita sa mga Hentil, agod nga makabati sila sini kag magtuo.
Kag ang Dios nga nakahibalo sang tagipusoon sang mga tawo nagpakita sang iya pagbaton sa mga Hentil paagi sa iya paghatag sa ila sang Espiritu Santo, subong sang iya paghatag man sini sa aton.
Ti, karon, ngaa bala nga ginatilawan ninyo ang Dios sa pagpapas-an sa mga gintuton-an sang palas-anon nga indi gani madala sang aton mga katigulangan kag bisan kita mismo indi man makadala?
Naghipos ang bug-os nga grupo sang mabatian nila ang tanan nga ginsugid ni Bernabe kag ni Pablo nahanungod sang mga katilingalahan kag mga milagro nga ginhimo sang Dios sa mga Hentil paagi sa ila.
Bag-o lang ni Simon ginsaysay kon paano ginpakita sang Dios una ang iya kabalaka sa mga Hentil paagi sa pagkuha niya sa tunga nila sang mga tawo nga mangin-iya.
‘Sa tapos sini magabalik ako, kag ibalik ko ang napukan nga ginharian ni David, patindugon ko ini gikan sa iya pagkarumpag kag pabakuron ko ini liwat, siling sang Ginoo.
Sa baylo, sulatan naton sila kag singganon nga indi sila magkaon sang mga pagkaon nga nahalad sa mga diosdios, tungod kay nadagtaan ini, maglikaw sila sa pagpakighilawas, kag indi magkaon sang mga sapat nga napatay paagi sa pagkuga kag indi man magkaon sang dugo.
Kay madugay na gid nga ginabasa ang Kasugoan ni Moises sa mga sinagoga sa tagsa ka Adlaw nga Inugpahuway kag ang iya mga pulong ginawali sa tagsa ka banwa.”
Dayon ang mga apostoles kag ang mga katigulangan sang iglesia kag ang bug-os nga iglesia, naghisugot sa pagpili sang pila ka mga lalaki gikan sa ila grupo, nga ipadala sa Antioquia upod kay Pablo kag kay Bernabe. Ginpili nila si Judas nga ginatawag si Barsabas kag si Silas. Ini sila nga duha ginataha gid sang mga kautoran.
Nagpadala sila sang sulat paagi sa ila: “Kami nga mga apostoles kag ang mga katigulangan sang iglesia, nga inyo mga utod, nagapadala sang amon mga pag-abiabi sa tanan nga mga kautoran nga mga Hentil nga nagaestar sa Antioquia, Siria kag Cilicia.
Nakabati kami nga may mga tawo gikan sa amon nga nagkadto sa inyo nga naggamo kag nagtublag sa inyo tungod sang ila mga ginpanghambal. Wala kami maghatag sa ila sang mga pagtudlo sa paghimo sini.
Gani naghinun-anon kami kag naghisugot sa pagpili sang mga tawo nga ipadala sa inyo. Maupod sila sa aton pinalangga nga mga abyan nga si Bernabe kag si Pablo
Kay ginpakamaayo sang Espiritu Santo kag ginpakamaayo man namon nga indi pag-ibutang sa inyo ang iban pa nga mga kabug-atan luas sa sining kinahanglanon nga mga pagsulondan:
indi kamo magkaon sang pagkaon nga nahalad sa mga diosdios. Indi kamo magkaon sang dugo. Indi kamo magkaon sang mga sapat nga napatay paagi sa kuga. Indi kamo magpakighilawas. Maayo gid sa inyo kon maglikaw kamo sa paghimo sini nga mga butang. Paalam sa inyo.”
Ini nga mga mensahero ginpalakat kag nagkadto sila sa Antioquia, sa diin gintipon nila ang bug-os nga grupo sang mga tumoluo kag ginhatag sa ila ang sulat.
Sa tapos ang pila ka adlaw nagsiling si Pablo kay Bernabe, “Mabalik kita sa tanan nga mga siudad nga aton ginwalihan sang pulong sang Ginoo kag bisitahon ta ang mga kautoran agod nga mahibaluan ta kon paano sila sa ila pagtuo.”
pero ginhunahuna ni Pablo nga indi maayo nga dalhon sia tungod kay wala sia nagpabilin upod sa ila tubtob sa katapusan sang ila bulohaton kundi nagpauli sia kag ginbayaan niya sila sa Panfilia.