Amuna anango abuluka ku Djudeya kwenda ku Antiyokiya mbaenda na pfundzisa abale anyakutawira Yezu kuti: “Mungakhonda kusibza ninga munalongera mwambo wa Mozesi, nkhabe kupulumuswa.”
Penepi pyacita kuti Paulu na Bharnabhasi alongane na iwo pikulu, mbaketesana na iwo. Na tenepo, asankhula Paulu na Bharnabhasi pabodzi na anango, kuti aenda ku Djerusalema akhapfundzisane penepi pabodzi na apoxtolo, na akulu a magereja.
Penepo, abale a gereja ya ku Antiyokiya aatuma mbaenda. Mbwenye pakupita kwawo na ku dziko ya Finisya na ya Samariya, alonga na thangwi ya kutawira Mulungu kudacita anthu ale adakhonda kukhala madjuda. Na tenepo, abale akomerwa pikulu kakamwe na mphangwa zenezi.
Mudafika iwo ku Djerusalema, atambirwa mwadidi na abale a gereja, na apoxtolo, pabodzi na akulu a magereja, mbaapanga pyonsene pidacita iwo na mphambvu za Mulungu.
Na tenepo, anthu anango a pa nsoka wa ndale wa afarisi, akhadatawirambo Yezu, alamuka mbalonga tenepa: “Pisatongwa kuti ale adakhonda kukhala madjuda asibze, pontho atowezembo Mwambo wa Mozesi.”
Na tenepo, anthu onsene akhali mwenemu amatama, mbakhabvesera Bharnabhasi na Paulu mbakhalonga pirengo na pyakudzumisa pinango pikhadaacitisa Mulungu na manja awo, pakati pa ale adakhonda kukhala madjuda.
Thangwi kutomera kale na kale akhagumanika anthu akhalonga mwambo wa Mozesi m'mizinda yonsene, pontho mbukhaoniwa m'maSabudu onsene m'manyumba a kuphemberera.”
Atumiza na iwo tsamba ikhalonga tenepa: “Ife abale anu apoxtolo, na akulu a misoka ya anyakutawira Yezu, tisawangisa onsene anyakutawira Yezu adakhonda kukhala madjuda, ali ku Antiyokiya na m'pisa pinango pya Sirya na pya Silisya.