Pɔli nunu sera Dɛribe, ka taga Lisitɔrɔ. Kalanden dɔ tun b'o yɔrɔ la, a tɔgɔ ko Timote. A bamuso tun ye zuwifu ye, ka na la Yezu la. Nga a facɛ tun ye girɛki ye.
Cidenw ni Krista ka jama ɲamɔgɔ minw tun be Zeruzalɛmu, olu tun ye koo minw ŋaniya, Pɔli ni Silasi tun mana se dugu min na, u b'o ɲafɔ o yɔrɔ kalandenw ye, k'a ɲini u fɛ k'u k'o kuma nunu bato.
Lafiɲɛlon sera, an bɔra dugu kɔfɛ ka taga kɔɔ dɔ faan fɛ. An y'a miiri ko an bena zuwifuw ka Ala batoyɔrɔ sɔrɔ yen. An tagara muso dɔw lajɛnnin sɔrɔ, an sigira k'u waaju.
Muso dɔ tun be u cɛma, a tɔgɔ ko Lidi, jagokɛla tun lo. A tun be fani sɔngɔgwɛlɛnw le feere. Tiyatirika tun lo, a tun be siran Ala ɲa. Matigi barika la, a y'a tulo malɔ Pɔli ka kuma na ka ɲa.
Ale n'a ka somɔgɔw bɛɛ batizenin kɔ, a y'a fɔ an ye ko ni an y'a lɔn ko ale lanin be Matigi la tiɲɛ na, an ka sɔn ka na jigi ale ka luu kɔnɔ. A laban, an sɔnna a ta ma.
Loon dɔ, an tun be tagara Ala batoyɔrɔ la, jɔnmuso dɔ y'an kunbɛn. Jinatigi tun lo. A ka jina ka yeli tun kɛra sababu ye ka to ka nafoloba don a kuntigiw fɛ.
A tora o la fɔɔ tile damani. A laban, Pɔli ma se k'a muɲu. O la, a y'a ɲaa yɛlɛma k'a fɔ muso nin ka jina ye ko: «Yezu Krista tɔgɔ barika la, ne b'a fɔ i ye, bɔ muso nin na.» O yɔrɔnin bɛɛ, jina bɔra muso la.
Nga Pɔli y'a fɔ u ye ko: «U y'an bugɔ jama ɲana k'an don kaso la k'a sɔrɔ an ye Ɔrɔmukaw ye. Jalakikun fana ma sɔrɔ an na. Sisan, u b'a fɛ k'an bɔ dogodogo la. O te kɛ! Fɔɔ olu yɛrɛ ka na an bɔ.»