Ak kinyo agine Derbe ak Lustra: ak ogeero, kimi age ne bo alamalyet oloto, ne kigiguure Timoteo, weritab Chebyahudiot ne kiiyani; ago ki Yunanindet kwandanyi.
Ak eng’ betutab sabato kemandae ormarichet kebe ole negite ainet, ole kigilen oldab saet; ak kigiteb ng’ony ak keng’alalji kobogorisiek che kiga tuiyo.
Ak kigasech kobogoriot age, ne kigiguure Ludia, aldaindetab ngoroik che arusen ne birir, ne bo nganaset ne kiguure Tuatera, ne kiilosu Jehovah: ne kiyat Kiptaiyat muguleldanyi, si koepchi it tuguk che kimwaei Paulo.
Ak kiyai inendet ko u noto eng’ betusiek che chang’. Ago kiarogen Paulo mising’, ak kowelelgei ak kolenji tamirmirionoto, Kang’atin eng’ kainetab Jesu Kristo ale, mong’u eng’ inendet. Ak kimong’ eng’ sainato.
ak kibotan emet mising’ eng’ sainato, kot kotumdumgei lumeiywekab korgoret: ak eng’ sainato koyatogis kurgotik tugul; ak kiitiagogis tuguk che kigirate chi tugul.
Ak kingosiir eng’ ruondo ribindetab korgoret, ak kogeer kurgotikab korgoret ko yatotin, kong’us rotwennyi bo chok, ak ki negit kobargei, kolen kagochililyo kimonjororinik.
Ago kilenji Paulo ichek, Kagobirech eng’ taitab bik, ama kiruokwech, achek bik che ki Romanik, ak kogotoorjech korgoret; ak nguno komachei koonech eng’ ung’ot? Achicha, ma u noto; ago ingobwa icheget komutech kemande.