×

現代台語譯本漢字版

使徒行傳 17

1
保羅 及 西拉 經過 暗妃坡里 及 亞波羅尼亞 ,來到 帖撒羅尼迦 ,佇遐有 猶太 人的會堂。
2
保羅 照習慣入去會堂,連續三個安歇日,引用聖經及人辯論。
3
伊講解閣證明基督一定著受害,然後對死人中閣活。伊講:「我對恁宣揚的此位耶穌就是基督。」
4
𪜶中間有人受說服來信,就去隨 保羅 及 西拉 ;其中有一大陣敬畏上帝的 希臘 人,閣有𣍐少貴夫人。
5
毋拘 猶太 人起怨妒,就招一寡街頭的匪類,絞群結黨,擾亂全市,攻擊 耶孫 的厝,尋 保羅 及 西拉 ,欲給𪜶掠去交互民眾。
6
𪜶尋無,就將 耶孫 及一寡信徒拖去見地方官,喝講:「諸個給天下反輾轉的人嘛來到咱遮囉!
7
耶孫 竟然給𪜶收留。𪜶違背 羅馬 皇帝凱撒的法令,講另外有一個王叫做耶穌。」
8
群眾及地方官聽著諸個話著急不安。
9
官員對 耶孫 及其他的人收錢交保了後放𪜶出去。
10
彼暗,信徒透暝送 保羅 及 西拉 去 庇哩亞 。𪜶一下到位就入去 猶太 人的會堂。
11
諸個 猶太 人比 帖撒羅尼迦 的 猶太 人較開明,非常熱心領受道理,逐日查考聖經,看 保羅 所講的有確實無。
12
𪜶中間有真多尊貴的 希臘 婦仁人及查甫人信。
13
毋拘 帖撒羅尼迦 的 猶太 人一下知影 保羅 嘛佇 庇哩亞 啲傳上帝的道,就去遐煽動群眾,引起擾亂。
14
信徒隨時送 保羅 去海邊; 西拉 及 提摩太 留佇遐。
15
𪜶一路護送 保羅 到 雅典 。 保羅 吩咐𪜶叫 西拉 及 提摩太 盡量趕緊去及伊會合,然後𪜶就離開。
16
保羅 佇 雅典 啲聽候 西拉 及 提摩太 的中間,看著滿城攏是偶像,心真艱苦。
17
伊佇會堂及 猶太 人以及敬畏上帝的外邦人談論,嘛逐日佇市中心及所抵著的人談論。
18
有一寡伊壁鳩魯及斯多亞學派的哲學家來及伊辯論。有人講:「此個愛講話的啲烏白講什麼?」 有人講:「伊親像啲傳外國的鬼神。」𪜶按呢講是因為 保羅 傳耶穌及伊閣活的福音。
19
𪜶就給 保羅 拖到 亞略‧巴古 議場,對伊講:「你啲講論的新學說會當互阮知𣍐?
20
有一寡代誌阮聽了怪怪,阮愛知是什麼意思。」
21
原來所有 雅典 人及住佇遐的外國人用真多時間談論及聽新奇的事。
22
保羅 徛佇 亞略‧巴古 議場的中央,講:「各位 雅典 人,我看出恁佇逐方面有強烈的宗教熱誠。
23
我佇城內啲行,觀察恁敬拜的所在,嘛有看著一座壇,頂面寫:『獻互毋識的神』。恁所啲敬拜毋識的神,現在我報恁知。
24
此位創造宇宙及其中萬物的上帝是天地的主,無住佇人的手起的廟寺,
25
嘛無欠用人的手所獻的物,其實伊攏無需要,伊家己顛倒將性命,及氣,以及萬物賜互人類。
26
伊對一個人造出逐種族的人,互𪜶徛起佇地面上逐所在,閣代先給𪜶定年限及徛起的地界。
27
上帝按呢做是欲互𪜶尋伊,𪜶若抄尋就會尋著,其實伊及咱逐個人相離無遠。
28
因為『咱靠伊生活,行動,存在』;親像恁的詩人有的按呢講:『因為咱嘛是伊的子孫。』
29
既然咱是上帝的子孫,無應該將伊的神性看做及偶像仝款,是靠人的手藝,用金、銀,抑是石頭雕刻出來的。
30
人類猶活佇無知的時代,上帝無追究,毋拘現在伊命令全人類著悔改。
31
因為伊已經決定日子,欲用伊所指定的人照公義來審判全世界;伊互一個人對死人中閣活,用此個做憑據,互全人類通信。」
32
𪜶一下聽著死人閣活的事,有人給伊恥笑,嘛有人講:「關係此個事阮愛閣聽你講。」
33
然後 保羅 對𪜶中間出去。
34
不過有一寡人隨伊去,成做信徒,其中有 亞略‧巴古 的議員 杜尼修 ,閣有一個女士叫做 大馬哩 ,以及一寡及𪜶做夥的人。
Chinese TTVH 2021
The Bible Society in Taiwan, 2021
:
保存笔记