तित्थु तिसियो अक्विला नांऐ दा इक्क यहूदी माणु मिल्ला, जिसदा जन्म पुन्तुस प्रदेसे च होएया था। सैह़ अपणिया लाड़िया प्रिसकिल्ला सौगी इटली देसे ते हाल ई च आया था, क्जोकि क्लौदियुस महाराजें सारेयां यहूदियां जो रोम ते निकल़ी जाणे दा हुक्म दित्या था। तिस हुक्मे दिया बज़ाह ते सैह़ तिन्हां अल्ल गेआ।
जाह़लू पौलुस ग्लाणा लग्गा ई था, तां गल्लियो हाकम यहूदियां नैं ग्लाणा लग्गा, “हे यहूदियो, जे एह़ अन्याय या बुराईया दी गल्ल हुंदी, तां ठीक हुंदा कि मैं तुहां दी सुणदा।
अपर जे एह़ बैंह्स बसाई दे सब्दां च, कने नां दे बारे च कने तुहां दिया व्यबस्था दे बारे च ऐ, तां तुहां ई जाणन; क्जोकि मैं इन्हां गल्लां दा न्यायी नीं बणना चांह़दा।”
अपुल्लोस नांऐ दा इक्क यहूदी, जिसदा जन्म सिकन्दरिया सैहरे च होएया था, जेह्ड़ा बड़ा ग्लांणे आल़ा (विद्वान) मरद था, कने पवित्रशास्त्र जो अच्छी तरांह ते जाणदा था इफिसुस सैहरे च आया।
तिन्हीं प्रभु दे रस्ते दी सिक्षा पाईयो थी, कने मन लगाई करी यीशुये दे बारे च ठीक -ठीक सणांदा कने सखांदा था, अपर सैह़ सिर्फ यूहन्ने दे बपतिस्मे दी गल्ल जाणदा था।
जाह़लू तिन्हीं फैसला कित्ता नदी पार करी नैं अखाया प्रदेसे जो जां तां बसुआसी भाऊआं तिसियो हिम्मत देई करी चेलेयां जो लिख्या कि सैह़ तिस नैं ढंगे नैं मिल्ले; कने तिन्हीं तित्थु पुज्जी करी तिन्हां लोकां दी बड़ी मदत कित्ती जिन्हां अनुग्रह दी बज़ाह ते बसुआस कित्या था।