Apolɔs ni daa be Kɔrinti saha shɛli maa ka Pool daa gari chaŋ tin’ shɛŋa din be nuzaa polo n-daa mali hal ti paai Ɛfɛsus. Nimaani ka o daa nya Yisa nyaandol’ shɛba
Ka Pool daa zaŋ o nuhi pa bɛ zuɣu, ka Naawuni Shia Kasi daa siɣi bɛ zuɣu na, ka bɛ tɔɣisiri tinzun yɛligu balibu kam yɛtɔɣa min’ anabitali yɛtɔɣa Naawuni Shia Kasi maa yiko ni.
Amaa ka bɛ ni shɛb’ suhuri daa kpɛm’ pam ka bɛ zaɣisi yɛda niŋbu, ka tari Yisa soli maa daɣiri salo maa ni. Di saha ka Pool daa chɛ ba, ka woligi Yisa nyaandoliba n-zaŋ ba chaŋ Tairanus kariŋ duu nti tɔɣisiri Naawuni yɛla dabisili kam.
Hal bɛ daa yi zaŋ anchitinima bee situra din shihi ŋun’ Pool nti pa barinim’ zuɣu bɛ nyarila alaafee, ka alizin’ biɛri gba daa zɔri ka chɛri bɛ ni ʒi shɛb’ zuɣu.
Di saha ka Yɛhudianim’ ninvuɣ’ shɛb’ bɛn daa gɔri gindi ka nyɛ bɛn gba kariti alizin’ biɛri daa zaŋ ti Duuma Yisa yuli n-yɛri alizin’ biɛri bɛn ʒi niriba zuɣu, “Pool ni yihiri Yisa so waazu la yuli zuɣu, wariya ka chɛ ba!”
Ka bɛ ni pam bɛn daa nyɛ bukpahinim’ laɣisi bɛ tabibi tumbu kundinim’ na nti nyɔri buɣim niriba maa ninni; ka bɛ daa mali di liɣiri laasabu ka di paai kaman ninvuɣ’ tusaanu dahin yini tuma yɔri.
Dimbɔŋɔnim’ nyaaŋa ka Naawuni Shia Kasi daa kpaŋsi Pool suhu ka o lo nia ni o ni doli Masidɔnia mini Akaia polo chaŋ Jɛrusalɛm; ka daa lan yɛli ni o yi paai Jɛrusalɛm, shee ka o gari Rom gba.
Anzinfa doora ŋun yuli daa booni Dimitirius daa malila anzinfa n-doori buɣili Aritɛmis binnana, ka o mini bɛn daa laɣim tumdi di tuma nyari liɣiri pam di ni.
Ka yi nya ka wum ka di pala Ɛfɛsus ŋɔ kɔŋko, amaa Ɛsha tiŋgbɔŋ ni zaa ka Pool ŋɔ kul yɛri niriba ni salinim’ ni zaŋ bɛ nuhi mali buɣ’ shɛŋa pala shɛli; lala ka o niŋdi lɛbigiri niriba pam suhuri.
Dinzuɣu pa ti tuma ŋɔ kɔŋko n-yɛn be barina ni, amaa Aritɛmis ŋun nyɛ ti buɣ’ titali, ka Ɛshanim’ mini dunia zaa jɛmd’ o la jɛmbu duu nti yɛn kpalim yoli, hal di pa shɛli ka buɣili Aritɛmis maŋmaŋ’ gba ti kɔŋ jilima sokam sani.”
Ka tiŋ’ maa zaa dam, ka salo kabi chaŋ ti gbaai Gaiɔs mini Aristakus bɛn daa yi Masidɔnia na ka nyɛ Pool dolintab’ la n-dari ba tahi tiŋ’ maa nim’ laɣiŋgu shee.
Ka salo maa ni shɛb’ daa tahiri yɛra, ŋ-ŋɔ nyɛla ŋ-ŋɔ; ka bɛn’ la mi yɛra, ŋ-ŋɔ nyɛla ŋ-ŋɔ; dama salo daa kul tahirila yiriŋ, hal bɛ shɛb’ daa bi mi din chɛ ka bɛ laɣimna.
Ka salo maa ni shɛb’ daa tɛhi ni yɛla maa ʒila Alikizanda zuɣu, Yɛhudianim’ ni daa daag’ o zali tooni la zuɣu; ka o daa kpuɣ’ o nuu gahi salo maa ni o wuhi ba din niŋ.
Salo maa ni daa baŋ ni o nyɛla Yɛhudia nir’ maa ka bɛ zaŋ kaman awa mun’ ayi n-duhi bɛ yee yɛra, “Ɛfɛsusnim’ buɣili Aritɛmis galisiya pam! Ɛfɛsusnim’ buɣili Aritɛmis galisiya pam!”
Ka tiŋ’ maa gbaŋŋmara daa gooi salo maa ka yɛli, “Ɛfɛsusnima, ŋuni n-lee beni n-ʒi ni Ɛfɛsusnim’ nyɛla bɛn guli buɣili Aritɛmis ŋun galisi ŋɔ duu mini kuɣ’ shɛli din daa yi zuɣusaa luna la?