La a Poll zĩnda Gɛrs soolem kiis a tãabo. La yẽ rag n dat n kẽe koom-koglg n kẽng Siiri, la Zuif-rãmbã sẽn soos n sed n dat yõk-a wã yĩnga, yẽ yãka yam n na n lebg n tũ Masedoan sore.
Neb nins sẽn yãag a Poll n ta Azi soolma, yaa Beere rao a Pirus biiga a Sopatɛɛr ne a Aristark ne a Sekõndus sẽn yit Tesalonik la a Gayus sẽn yit Dɛrb tẽnga, ne a Tɩmote ne a Tisik la a Torfim sẽn dog Azi soolma.
La bur sẽn ka rã-bɩll kibsã loogr poore, tõnd mensã kẽe koom-koglg Filip. La sẽn kaoos rasem a nu, tõnd tɩ bʋʋga bãmb Torwas, la d zĩnda be rasem a yopoe.
Dimaas daar zaabre, tõnd dag n tigmame n na dɩ tẽegr buri. A Poll sẽn da tog n loog vẽkembeoogã, yẽ moona koɛɛgã ne karen-biisã n gom n kaoos halɩ n ta yʋn-sʋka.
La bi-bɩɩg a yen yʋʋr sẽn boond t'a Etikus n da zao fẽnetr zugu. La a gũsa sõama, a Poll koe-moon-wokã wakate. La gõeemã sẽn dɩk-a wã yĩnga, a yii yĩngr ro-tomdem a tãab soabã n lʋɩ tẽnga. La b rɩk-a lame n mik t'a kiime.
Tõnd denga taoor n kẽ koom-koglg n kẽng Asos, yaa be la tõnd da tog n tɩ seg a Poll n dɩke, yẽnda n da yãk yam a woto n na n kẽn ne nao n kẽng be.
Tõnd yika be ne koom-koglgã n looge, la vẽkembeoogo, tõnd taa tẽng sẽn boond tɩ Siyo taoore, la daar ning sẽn pʋgdã, tõnd taa Samos, la daar ninga sẽn pʋgla yẽ wã, tõnd siga Mile.
A Poll dag n sɩd yãka yam n na n loog Efɛɛs n da sig be ye, sẽn na n yɩl n da sãam weer Azi soolme wã ye. Tɩ bõe, yẽ ra yãgdame n datẽ tɩ sã n tõe, bɩ a zĩnd Zeruzalɛm Pãntekotã daare.
La b sẽn wa n ta a Poll nengẽ, yẽ yeel-b lame yaa: Yãmb mii mam yel-manesem sẽn yɩ to-to ne yãmb wakat fãa, sẽn sɩng ne daar ning mam sẽn wa Azi soolmã pʋgẽ wã.
La mam tagsdame tɩ mam vɩɩmã ka tar yõod ne maam ye. La sẽn pak maam yaa tɩ m wee n tõog n maan m tʋʋmdã hal n ta a tɛka, n tõog n baas tʋʋmd ning Zu-soab a Zezi sẽn ning mam zugã, n moon Wẽnnaam barkã koe-noogã.
La moasã, mam basda yãmb Wẽnnaam nugẽ, la m basd-y ne bãmb bark goamã sẽn tar pãng n tõe n paas yãmb daoodo, la a kɩt tɩ yãmb yɩ pʋɩt-n-taas ne Wẽnnaam neba fãa wã.
Mam wilga yãmb bũmb fãa pʋgẽ tɩ d tog n tʋma a woto n tõog n sõng naong rãmba, la d tẽeg goam nins Zu-soab a Zezi meng sẽn yeelã: Tɩ kõ bee bark n yɩɩd tɩ reege.