kote achilo trin chon. Kana lela te likel ande llimia te llaltar ande Siria, kana llangla kai e judiura diepe orba te maren le ondaka mangla te irilpe, ta nakhlo pale katar e Masedonia.
Llele lea o Sopatro katar e Berea, chavo e Pirroko; ta o Aristarko ta o Segundo katar e Tesalonika, o Gaio katar o Derbe, o Timoteo, ta i o Tikiko ta o Trofimo, kai sea katar e Asia.
Kana nakhle e llivesa kai jalpe o marrno kai inai le levadura, llelamtar katar o Filipos ande iek llimia, ta pala e panch llive avilam ando Troade, kote achilam efta llive.
Ando kurko chidinailam te phaga o marrno, ta o Pablo dia orba e llenenge kai pachan. Sar saia te llaltar thiarinako, dia lenge orba mai but llik kai e desudui e rachake.
Ta iek lleno terno kai ikhardola Eutiko besela pe penllerava. Sar o Pablo dia but orba, o terno lia le e lindri ta soutotar, ta katar e trito soba kai saia upre pelotar ta vazdiele mulo.
Llelamtar kotar, ta thiarinako nakhlam angla o Kio, ta kana nakhlo gua llive avilam ando Samos. Kotar llelam iek llive ios ande llimia, ta avilam ando Mileto.
Cherdamle gia soke o Pablo te na achel ande Asia ni kamla te nakhel ando Efeso, soke mangela te avel oma ando Jerusalem te sai avel kote ando llive katar o Pentekostes.
Sa o vreme sema tumenchar ta radiu e Gazdake prostimaia, bute ausenchar ta maskar but brige kai avile mange cheres so mangena te cheren mange e judiura.
A me ni thovav sama katar niso, ni katar mo zivoto, o te si te merav, samo te resav kote kai prastav veselimaia, kote kai getolpe o drom, ta te cherav so phenda mange o Gazda o Jesus te phenav e lachi viasta katar o volipe e Devleko.
Goleke thoven sama ta arakhen sa e llenen katar e khanlliri, kote kai o Santo Duo thoda tumen chobanura te arakhen e khanlliri e Devleki, kai vou chinda pe ratea.
Akana, phlalalen, mukau tumen ande Devleke va ta ande leki orba katar leko volipe. Le si e zor te cherel tumen te barion ando Duo ta te del tumen sa so phenda kai ka del e llenen katar leko foro o santo kana dia po alav.
Ta sa o vreme sikadem tumen kai gia si sar trubul te radi ta te pomozi golen kai trubul len, ta te da amen golli katar gola alava kai o Gazda o Jesus phenda: Mai but veselia si kana de neko kana le.