|
| 1 |
|
| భాయిబందో, బాపువో, మ అబ్బ తమార్ ముణాంగ కూఁ జకోవాతేన సామ్ళో. |
|
| 2 |
|
| ఊ హెబ్రీవాతేమా వాతే కరేర్ సామ్ళన్ ఘణ్ గచ్చప్ రేజనా ఊ హనూకేన సరూకీదో. |
|
| 3 |
|
| –మ కిలికియమా ఛజకో తార్సేమా హుయొజకో యూదా జాతేరో. పణ్ ఏ శేరేమా గమలీయేలేర్ పగెకన వదన్, ఆపణ్ వడ్బూడేర్ ధరమ్ శాస్త్రేమా కేజకో చాల్ సీక్లేన్, తమ్ సే ఆజ్ ఛజూఁ దేవేర్ వాస ఆసాతీ రేన్ |
|
| 4 |
|
| ఏ వాటేమా రజె మాటియూనన్ బీరేవూన భందాన్ జేలేమా ఘాల్తో మర జేతాణీ భావేటీ ఘాలో. |
|
| 5 |
|
| ఏర్వాస ప్రధాన్ యాజకన్, మోట్ సే మార్ గవాయి ఛ. మ ఉందేర్ ఢైఁ తీ భాయిబందు కన కాగద్ లేలేన్ దమస్కే వాళూన సదా భాందన్ సజా దేర్ సారు యెరూషలేమేన లావ్ణోకన్ ఒత్త గో. |
|
| 6 |
|
| మ జాతో దమస్కూర్ ఢైఁ ఆయొజనా, దొప్పెరేర్ వక్తే పర ఆస్మానేతి మోటొ వజాళో అణాఛక్ మార్ ఘేరన్ ఝాంకొ. |
|
| 7 |
|
| మ జమ్మీ ఉంపర్ పడన్-సౌల్, సౌల్ తుఁ కసెన మన భావేటీ పాడ్రోచీ? కన్ ఏక్ ఆట్ కేర్ మ సామ్ళో. |
|
| 8 |
|
| జేతీ మ-ప్రభూ, తూఁ కూణ్ కన్ మ పూచోజనా, ఊ-మ తూఁ భావేటీ పాడ్రోజకో నజరేతేరో యేసు ఛుఁ. కన్ మనకో. |
|
| 9 |
|
| మార్ సాత్ రజకో ఓ వజాళేన దీటె పణ్, మాతి వాతే కీదో జేర్ ఘోగ్ ఓ సామ్ళేకొని. |
|
| 10 |
|
| జనా మ - ప్రభూ, మ కాఁయిఁ కరుఁకన్ పూచ్తేఖమ్, ప్రభు -తూఁ ఊటన్ దమస్కేమా జో. ఒత్త తూఁ కరేన నియమ్ వేన్ ఛజకో సే ఒత్త తోన కచకన్ మన కో. |
|
| 11 |
|
| ఓ వజాళేర్ కార్ణే మ ఆందోవేగో. జనా మార్ సాత్ రజకో మార్ హాత్ పక్డన్ మన చాలలేన్ దమస్కేన లాయే. |
|
| 12 |
|
| ఒత్త ధరంశాస్త్రేన పక్డన్ చాల్రోజకో భక్తి దార్ ఛజకో ఆననీయ కజకొ ఏక్ ఆద్మీ వెత్తో. ఊ దమస్కేమా వస్రేజకో సే యూదా వాళూఁతీ ఆచ్చొ నామ్ లాల్దో. ఊ మార్ ఢైఁ ఆన్ హూబ్రేన్, |
|
| 13 |
|
| సౌల్ భాయీ, నంజర్ పాలకన్ ఆన్ మన కేతేఖమ్, ఓ ఘడీమాజ్ మ నంజర్ పాలేన్ ఓన దీటో. |
|
| 14 |
|
| జనా ఊ - ఆపణ్ బాప్ దాదాఁవురొ దేవ్ ఓర్ మర్జీన మాలమ్ కర్లేన, ఓ నియత్ దారేన దేకేనన్, ఓర్ ఖాస్ వాత్ సామ్ళేన తోన నియమ్ కీదోచ. |
|
| 15 |
|
| తూఁ దీటో జేర్ వడీతీన్, సామ్ళో జేర్ వడీతి సే జనూర్ ముణాంగ ఓర్ గవాయి వేన్ రేచీ. |
|
| 16 |
|
| జేతీ తూఁ ఠాట్ కసెన కరేచీ? ఊటన్ ఓర్ నామేన అరజ్ కరన్ బాప్తీసమ్ లేలేన్ తార్ పాప్ ధోల కన్ కో. |
|
| 17 |
|
| జనా, మ యెరూషలేమేన ఫేర్ ఆన్ దేవళేమా అరజ్ కర్తో రూఁజనా, పర్వష్ వేన్ ప్రభూన దీటో |
|
| 18 |
|
| జనా ఊ-తూఁ జెల్దీ యెరూషలేమేన ఛోడ్దేన్ జో. మార్ కార్ణే తూఁ దస్ జకో గవాయి ఏ మానెని కన్ మనకో. |
|
| 19 |
|
| జేతి మ -ప్రభూ, హర్యేక్ సమాజ్ మందిరేమా తోన విశ్వాస్ కీదే జేన మ జేలేమా ఘాల్తో మార్తో రోకన్ ఉందేన పక్కో మాలమ్. |
|
| 20 |
|
| ఉజ్జీ తార్ వడీర్ గవాయి దీనొ జకో స్తేఫెనేర్ లోయీ వఛ్కళో జనా. మ సదా ఢైఁ హుబ్రేన్ ఓర్ కార్ణే ఖుష్ వేన్ ఓన మార్నాకె జేర్ కప్డార్ కావ్లి రీదో కన్ కో. |
|
| 21 |
|
| జేతీ ఊ-జో, మ ఘణ్ దూరేమా అన్య జనూర్ కన తోన మేలూంచుఁ కన్ మాతి కో. |
|
| 22 |
|
| ఏ వాతేతాణు ఊ కోజకో ఓ సామళ్తేర. జనా, ఓ అసో ఆద్మీ బంచేన ఛాజెనీ. ధర్తీ ఉంపర్ నరజుఁ ఓన మార్నాకో కన్ ఓ కల్కారీ మారే. |
|
| 23 |
|
| ఓ కల్కారీ మార్తే ఉందేర్ కప్డా ఝడ్కార్లేన్ ఆస్మానే సామ్ ధూడ్ రెడ్రే జనా |
|
| 24 |
|
| ఓ ఓర్ ఖిలాఫ్ హనూ కల్కారీ మారే జేర్ కారణ్ కాఁయిఁ కన్ మాలమ్ కర్లేన, హజార్ జణార్ హకమ్ దార్ చామ్టీతీ ఓన మారన్ నేవొ కర్ణో కన్ కేన్ బంగ్లా మా లేజావో కన్ హకమ్ దీనో. |
|
| 25 |
|
| ఓ పౌలేన బద్నాతీ భాంద్రే జనా, ఊ ఓర్ ఢైఁ హూబోజే సో సిపాయీర్ సర్దారేన దేకన్, నేవొ నకర జూంజ్ రోమావాళో ఛజకో ఆద్మీన చామ్టీతీ మారేన తమేన హక్ ఛక? కన్ పూచో. |
|
| 26 |
|
| సో సిపాయీర్ సర్దార్ ఊ వాత్ సామ్ళన్ హజార్ జణార్ ఉంప్రేర్ హకమ్దారేర్ కన్న ఆన్ తూఁ కాఁయిఁ కరేన జారోచీ? ఈ ఆద్మీ రోమారో ఛ, ఖబర్దాన్ కన్ కో. |
|
| 27 |
|
| జనా హజార్ జణార్ హకమ్ దార్ ఆన్ ఓన దేకన్ తూఁ రోమేవాళోక? ఊ వాత్ మన కకన్ పూచ్తేఖమ్ |
|
| 28 |
|
| ఊ - హావకన్ కొ. హజార్ జణార్ హకమ్దార్, మ జాదా పీసాదేన్ రోమేరో హక్ కమాలిదో కన్ కో; జేతీ పౌల్-మతో హుయొ జనాతీజ్ రోమేవాళో కన్ కో. |
|
| 29 |
|
| జేతీ ఓన నేవ్ కరేన జాయెవాళ్ జన్నాజ్ ఓన ఛోడ్దీనె. ఉజ్జీ ఊ రోమేవాళో కన్ మాలమ్ కర్లిదో జనా, ఓన భాందె జేతీ హజార్ జణార్ హకమ్ దార్ సదా చమక్ గో. |
|
| 30 |
|
| యూదా వాళ్ ఓర్ ఉంపర్ పాడె జకోదావ్ కాఁయిఁకో ఊ ఘట్ మాలమ్ కర్ణో కన్ కూంతన్, హజార్ జణార్ హకమ్ దార్ లారేర్ దాడ ఓన ఛోడాన్, ప్రధాన్ యాజకన్, మోట్ సభావాళ్ సే భళన్ ఆవ్ణోకన్ హకమ్ దేన్, పౌలేన లేన్ ఆన్ ఉందేర్ ముణాంగ హూబ్ రకాడో. |
|
|
|
|