“Juda mi, Kilikia rama Tarsa khuaa piang ka ni; nimahsela, he khawpuia sei lian hi ka ni. Gamaliela hnênah min thlahtute Dân khermei taka zawm ka zir a, vawiina nangniho ang bawk hian Pathian tân ṭhahnem ka ngai ṭhîn a.
Puithiam lalber leh upate rorêl ṭhu khâwm pawhin mi hriatpui alâwm. An hnên aṭangin Damaska khuaa unaute pêk tûr lehkha ka la a, chuta awmte chu hrem atân phuar chunga Jerusalem-a rawn hruai tûrin ka kal a.
Tin, keiin, ‘Lalpa, eng nge ka tih ang?’ ka ti a. Lalpa chuan, ‘Tho la, Damaska-ah lût rawh, tah chuan thil engkim i tih tûra ruatte chu an lo hrilh ang che,’ a ti a.
Sipai hotu lalber chuan Paula chu kulhbîngah a hruai luhtîr a, a chunga chuti taka an au chhan chu a hmuh chhuah theih nân hruihruala vuaka, dâwp tûrin thu a pe a.
Vuak tûra savun hruia an phuar zawhin, Paulan a kianga ding sipai za hotu hnênah, “Rom mi, thiam loh chantîr pawh la ni si lo hi vuak a thiang em ni?” a ti a.
Sipai hotu lalber chuan, “Kei chuan Rom mi nihna nei tûrin sum tam tak ka sêng asin,” a ti a. Paula erawh chuan, “Kei zawng Rom mi rênga piang ka ni,” a ti a.
Tichuan, sawisa chunga dâwp tumte chuan Paula chu an ṭînsan ta nghâl a, sipai hotu lalber pawh chuan Rom mi a lo phuar mai tih a han hriatin a hlauthâwng hle a.
A tûkah chuan Juda-ten Paula chungah thu eng nge an neih hriat chian tumin, sipai hotu lalber chuan puithiam lalte leh Sanhedrin mite inkhâwm tûrin thu a pe a. Paula chu a phelh a, a hruai chhuk a, an hmaah a dintîr a.