Me sim Židovo, arakhadilem ande o Tarsus ande e Tsilisia; numa me barilem ande kado foro, ai vorta sikiardo ka le punře katar le Gamaliel ande o zakono amare dadengo. Keravas e butji le Devleski, sar tume adies.
O baro rašai ai sa e kris katar le purane si muře martururi. Inke me lem lendar lila le phralenge anda o Damasko, kai me gelem eta t'anav phangle ande o Jerusalem kudalen kai sas kothe ai te dav len strafo.
Eta, jekh manuš akharen les Ananias, manuš kai patial sar si o zakono, ai kai sa le Židovuri kai bešenas ande o Damasko phenenas jekh laši diela pa leste,
Ai me phendem: Baria, von inke žianen ke me thavas ande temnitsa ai keravas te maren řaiasa ande le khangeria židovitsko kudalen kai patianas ande tute,
Teharin, sar kamelas te žianel vorta so le Židovuri thon beda pe leste, o fitsiri lias pa leste le phanglimata, ai dias ordina ka le bare raša ai ka sa e kris le židovongi te kjiden pe; porme, anenas tele le Paul, vo thodias les maškar pende.