Kolenji anyun Paulo inendet, Tun birin Jehovah, inye inatut ne kigisal koleelit: itebye ak iruokwa ko u ye mwaei Ng’atutiet, ak ing’ate kebira ama chamdoi Ng’atutiet?
Ago ye kingonai Paulo kole, Sadukaik alage, ko Parisaik alage, komwa eng’ kutit ne o eng’ kapkiruok kole, Che kitupche, a Parisaindet, weritab Parisaik: kagiruokwa agobo kamang’unet ak ng’eetyet ne bo che kigobek.
Kong’eet anyun bolatet ne o: ak kitononso sirik alak che bo Parisaik, ak koborio kolen, Ma kinyoru yaitio eng’ chichi: ak tos nee eng’ okwek ngot ko kang’alal ak inendet tamirmiriet, anan malaika?
Ak ye kingong’eet toiyet ne o, koiywei kiptaiyat ne o kole, abere togot kotonaton bichu Paulo, kong’at anyun askarik kochortagei ak komut inendet eng’ kimnatet eng’ kwenunywa, ak komut konyo irimet.
Ak eng’ kemout ne kiisubi noto kotonon Kiptaiyat eng’ ye negite inendet ak kolenji, Nyiganitu: amu ko u ye kiibaorianja eng’ Jerusalem, ko u noto kanyol ibaorian eng’ Rom agine.
Oborji anyun okwek ak boisiek kiptaiyat ne o komut inendet kochorgei konyo ole omi, ko u ne omache ogin komie ng’alekyik: ak ki chobotin achek kebar inendet agot kotom korikyech.
Komut anyun inendet kwo ole mi kiptaiyat ne o, ak kolenji, Kaguura Paulo, kimonjororiot, awa ole mi inendet, ak komwawa amutun murenoni konyo ole imi, tinyei ng’olyo ne machei komwaun.
Ak kiguur kiptainik aeng’ che bo bogolwogik koba ole mi inendet, ak kolenji, Ochob askarik bogol aeng’ koba agoi Kaisaria, ak askarik tamanwogik tisab che lanyei mbartanyisiek, ak murenikab ng’otwek bogol aeng’, eng’ sait somok ne bo kemoi:
Ak ye kongiborua kele kogechob ng’alek eng’ ung’ot agobo inendet, ayogu inendet konyo olong’ung’ achogune, ak ang’at che kataamikyik si komwa ng’alek eng’ taing’ung’, che itaame inendet.