ताह़लू चपेड़ खाणे ते बाद पौलुसैं तिस नैं ग्लाया, “हे चूना फेरियो दीवार मतलब हे पाखंडी, परमात्मा तिज्जो मारगा। तू व्यबस्था मताबक मेरा न्याय करणे जो बैठेया ऐ, कने भिरी क्या कानून दे खलाफ मिन्जो मारने दा हुक्म दिंदा ऐ?”
जाह़लू बड़ी लड़ाई होई, तां सपाईयां दे सरदारैं इस डरे नैं कि सैह़ पौलुसे दे टुकड़े-टुकड़े ना करी दैं, सपाईयां जो हुक्म दित्ता कि आई करी तिसियो तिन्हां दे बिच्चे ते जबरदस्ती कड्डी करी गढ़े जो लेई जा।
इसतांई हुण महासभा सौगी सपाईयां दे सरदारे जो समझा कि पौलुसे जो तुहां अल्ल इआं लेई ओन, मन्नेया कि तुहां तिसदे इस मुद्दे जो बड़ी बरीकिया नैं छाणबीण करी नैं सुलझाणा चांह़दे हन; कने ऐत्थु अहां तिसदे पुज्जणे ते पैहल्लैं तिसियो मारने तांई त्यार रैंह्गे।”
तिन्हीं ग्लाया, “यहूदी अगुआं इक्क होई नैं साजस रची, कि तिज्जो नैं विणती करी नैं कि कल पौलुसे जो महासभा च अणन, मना कि तुहां तिसदे इस मुद्दे जो बड़ी बरीकिया नैं छाणबीण करणा चांह़दे हन।
अपर तिन्हां दी मत सुणदा, क्जोकि तिन्हां च चाल़ियां ते जादा माणु पौलुसे जो मारने दे चक्करे च हन, जिन्हां कसम खाई नैं एह़ ठाणी लेआ कि जाह़लू तिकर सैह़ पौलुसे जो मारी नीं दैन, ताह़लू तिकर ना तिन्हां खाणा ना पीणा। कने हुण सैह़ त्यार हन कने तेरे वचने दा इन्तजार करा दे हन।”
ताह़लू सपाईयां दे सरदारैं दूँ सूबेदारां जो सद्दी करी ग्लाया, “दो सौ सपाई, सत्तर घुड़सवार, कने दो सौ भाले आल़े, कैसरिया सैहरे जो जाणे तांई त्यार करी रखेयां, कने तू राती दे नौ बजे निकल़ेयां।
ताह़लू मैं जाणी गेआ कि सैह़ अपणी यहूदी व्यबस्था दे विवादां दे बारे च इस पर दोस लग्गा दे हन, अपर जान्नी ते मारी दैणे या बन्नी करी रखणे आल़ा तिस च कोई दोस नीं।
जाह़लू मिन्जो दस्सेया कि इस माणुये जो मारने दे चक्करे हन, तां मैं इकदम तिज्जो अल्ल घल्ली दित्ता; कने दोस लगाणे आल़े यहूदियां जो भी हुक्म दित्ता कि तेरे सामणै तिस पर दोस लगान।”
कने जाह़लू पता लग्गा कि एह़ किलिकिया प्रदेसे दा ऐ; तां तिस नैं ग्लाया, “जाह़लू तिज्जो पर दोस लगाणे आल़े यहूदी ओंगे, तां मैं तेरा फैसला करणा।” कने तिन्हीं पौलुसे जो हेरोदेस राजे दे किल्ले च पैहरे च रखणे दा हुक्म दित्ता।