Tile duuru tɛmɛnin kɔ, sarakalasebagaw kuntigiba Ananiyasi ni cɛkɔrɔba damani nana Sezare. Cɛɛ dɔ tun b'u fɛ min be mɔgɔ dɛmɛ kiti la, a tɔgɔ ko Tɛritilusi. U tagara masacɛ ka lasigiden fɛ waasa ka Pɔli jalaki.
U ye Pɔli wele ka bɔ. Tɛritilusi ye kuma daminɛ, a ko lasigiden ma: «Lasigidenɲuman, an be hɛrɛba min na jamana kɔnɔ bii, e le barika lo. E ka hakilitigiya baara kosɔn, yɛlɛmani caaman kɛra.
Lasigiden ye sira di Pɔli ma ko a ka kuma. O la, Pɔli ye kuma ta k'a fɔ ko: «Ne y'a lɔn ko ele Felikisi le ye an ka siya kititigɛbaga ye kabini saan damani. O la, ne tena siran ka n ka kuma fɔ.
A mɔgɔ te yen min be se k'a disi gosi k'a fɔ ko a ye ne ye sɔsɔli la ni mɔgɔ dɔ ye Alabatosoba kɔnɔ, walima kalansow dɔ kɔnɔ, walima dugu kɔnɔ. N ma kɛ sababu ye ka mɔgɔw bila ɲɔgɔn na fana.
Ayiwa, ne kɔni be min lɔn, o filɛ nin ye: olu k'o sira nin te siraɲuman ye, ne be baara kɛra an bɛmaw ka Ala ye ka kɛɲɛ n'o sira ye. Min bɛɛ fɔra sariya la, ani kiraw ye minw sɛbɛn, ne b'o bɛɛ bato.
Pɔli kumana ka taga tilenninyako faan fɛ, ni yɛrɛminɛko, ani Ala ka kiti nata faan fɛ minkɛ, Felikisi siranna kosɔbɛ, a y'a fɔ Pɔli ye ko: «A ka ɲi ten, taga, n bena i wele siɲɛ wɛrɛ.»
Saan fila tɛmɛna, mɔgɔ wɛrɛ nana Felikisi nɔɔ ta lasigidenya la. O tigi tɔgɔ tun ko Pɔsiyusi Fɛsitusi. Felikisi tun b'a fɛ zuwifuw k'ale tɔgɔɲuman fɔ minkɛ, a tagara ka Pɔli to kaso la.