Ak kingo pata peetuusyek muutu, kochoorgei Anania tisiindet ne oo ak poisyek alak, ak ng'alaalindet age, ne kiguure Tertulo; ak koboorchi pounindet ng'aleek che ko kitaame Paulo.
amu ki kegeer chiichi keele ineendet ko chii ne itoitos piich, ne ing'eeti chemerereet eng' Yahudik tugul eng' ng'wony komugul, ak kandoindet ne po kasubiigap Nazaretik.
Ak kingo kagoboorchine pounindet Paulo euut, kole kong'alaal, kowol Paulo kole, “Asaruge eng' poiboiyet, angen ale, ii kirwoogindet ne po pororyoni eng' kenyiisyek che chaang'.
Ago kang'ang'un niito, eng' Oranooto kuure icheek piteet age, aoote Kamuktaindet ne po kwanisyekyok, ak ayani tuguuk tugul ko uu ye mwaei Ng'atuutyet, ak che ki kisir eng' maotik:
Ago kingo pata peetuusyek alage, koit Felix, kobooto Drusila osotyonnyi, ne ki Chebyahudio, ak koyookto Paulo konyo, ak ki kas eng' ineendet agobo kayaneet eng' Kristo Jeso.
Ak ye kita kong'alaali agobo imanda, ak riibetapkei, ak kirwooget ne nyoonei, koiyweis Felix, ak kowol kole, “Ui korook; ak ye tuun anyooru poroindo ne myee, aguurin.”