Nakkle panch llive, ta o Ananias o mai Baro Popo avilo ande Sesarea nesave ppurenchar ta iekke llenea kai radila ande krisa kai ikkardola Tertulo. Gala llene avile kai o sudo te dosaren e Pablo.
Kana ande e Pablo, o Tertulo ttoda te dosarel le, ta ppenda e Felikseke: —Fala chuke si amen pas ta fala chuke kai cherdan te avel lachipe ande amari ppuv.
Ondaka o sudo ppenda e vastenchar e Pabloke te del orba, ta o Pablo ppenda: —Dragostimaia ka chacharau man angla tu, soke llanau kai tu san krisari but burs katar gaia ppuv.
A so sai ppenau chachimaia si kai radiu e Devleke kai si i me puranengo Del prema o Nevo Drom, kai von ppenen kai si iek sekta, soke pachau sa so si pisime ande lila katar o zakono ta so ppenen e poraukura.
A kana me cherava gala ezgode ta kana jaladem man prema o zakono, kote ni sea but llene ta ni saia burkania, ta kote maladem iek judiura kai avena katar e Asia.
Kana asunda gava o Feliks sar vou asundaia katar o Nevo Drom, mukla goia orba pe iek rig ta ppenda lenge: —Kana ka avel o Lisias o gazda e boñikonengo, vou ka ppenel mange mai but katar gala ezgode tumare.
Nakkle nesave llivesa ta o Feliks avilo pale pe romiaia e Drusila kai saia judia. Ta o Feliks bichalda te anen e Pablo, ta asunda so ppenela katar o pachape ando Jesukristo.
A kana o Pablo dia leke orba katar o zivoto ando chachipe ta te gazdaril o manus pe pete, ta katar e kris kai si te avel, ondaka o Feliks darailo ta ppenda leke: —Akana llatar. Me ka ikkarau tut kana ka avel man vreme.
Nakkle dui burs kotar ta po ttan katar o Feliks dia te gazdaril o Porsio Festo. Ta sar o Feliks mangela te achel lacho e judionenchar, mukla ppanglo e Pablo.