Kedau egavana akikiekin Paulo akani kinere, kobong'okini Paulo ebe. “Na anyuna eong' ebe kokaru kalu ipu ijo nes itubonok itung'a ka akwap kana, alakara eong' noi aking'ere nu atemar kuju kang'.
Mam Iyaudin adumun eong' etepegi itwan ipede kotogo ka Akuju, kere de mam kesi kadumuto eong' ecori itung'a ejie kosinagogin kere de kalaro kere ko ore ka Lokapolon.
Konye acamut eong' nu koking'aren kon, ebe ikamut atupite erot kalu iyuuto, Erot lo ebalasi kesi ebe loka aliokou, elipi eong' Akuju kes ka tapaa wok, kamunokite ng'ini ibore ni ebala ekisil kere igirito ikadwarak,
Konye ajaasi Iyaudin ice alomun koprovins kaloko Asia neni; ejii kesi ikulopek abunore nama kon, kolemutu ewosan kes kejaasi kesi ka ibore kipede ka eong'.
kemam kerait ibore ipe bon ni alimuni eong' na agwoya eong' koking'aren kes ebe, ‘Kitubokinete osi eong' lolo kanuka amunokitere eong' ebe itajaruno lukatwak!’”
Ketuborosi apaarasia adis, kobunete Felik ka aberu keng' Drusilla, na kerait Ayaudit; kosodi akijukiar konyaraune Paulo, kosodi akipup nesi inera kuju ka akiyuun kotoma ka Kristo Yesu.