“Arakaete Tumpa jei oreramɨkue reta pe uyapota iko mbae ikawiete ye wae. Jare jokua ko jae mbae opaete Jacob doce taɨ iñemoñaa reta wi uäro ñonoï uyerowia katu rewe. Jáeramo jae reta ara rupi jare pɨ̈tu rupi uyeyokui ñonoï Tumpa pe ikɨrëɨ rewe,” jei. “Erëi che arowia Tumpa añawe rupi uyapo oï jokua jae jei uyapota iko wae. Jare kua judío reta wɨrowia’ä jokua. Jáeramo jokua jeko pewa jae reta uñeapo ñonoï cheré. Jáeramo che kua pe aï nderowai, chemburuwicha wasu,” jei chupe.
Jayawe Pablo jei jokua judío joko pe ñonoï wae reta pe: “¿Maera pa pe reta perowia’ä peï Tumpa ipuere umbɨjekowe ye umanokue wae reta?” jei chupe reta.
Erëi warasɨ ara mbɨte rupi iko yawe tape rupi a rambuewe, aramoiño jembipe cheré jare che ndiwe yuraa wae reta re pëti tembipe uwerasɨ wae ara wi. Jokua tembipe jembipete ye warasɨ wi.
‘Epüa iyemboɨ. Che ayekuaa ma ndewe aipota ndiyeyokui waerä chewe ramo. Jare che nomondo aï nemɨmbeu waerä kua cherecha wae rewa. Jare nemɨmbeuta wi jokua aikuaakata aï ndewe wae,’ jei yandeYa chewe.
Echa’ä jae reta arakaete jei Cristo yae chupe wae uiporara ñotái iko jare umano ñotái iko. Jare joko wi jae rani ikowe yeta ou iko umanokue wae reta ipɨte wi uikuaaka waerä judío reta pe jare judío mbae wae reta pe wi Tumpa iñee añetete wae. Jare jukuärái jae ikota pëti tembipe rami chupe reta,” jei Pablo Agripa pe.
Jare Festo kua uyandu yawe, aramoiño jei chupe iñeeäta rewe: “¡Pablo, nembɨkere ma chawaa neï! Jeta mbaembae ndiyemboe ramo, nembɨkere ma ndapo,” jei chupe.
“Mase, mburuwicha wasu Agripa uikuaa kawi kua mbaembae rewa. Echa’ä uyeyapo’ä ko wɨari rupi jare jeräkua ma ko aipo chupe. Jáeramo che chepuere chemiäri chupe akɨye mbae rewe,” jei chupe.
Jare Pablo jei mburuwicha wasu Agripa pe: “Chemburuwicha wasu Agripa, ¿nderowia pa Tumpa iñee arakae umɨmbeu wae reta uikuatía wae? Che aikuaa nderowia ko jese,” jei chupe.
Jayawe Pablo jei chupe: “Aipota echa ɨmambae ani mbowɨ ara rupi nde jare opaete ïru añawe uyapɨsaka ñonoï cheré wae reta piyeyapo waerä che rami. Erëi awɨye peï kua nunga cadena pe,” jei chupe reta.
Jare Pablo jukuärái ma jei yawe, mburuwicha wasu Agripa uyemboɨ. Jare mburuwicha Festo, jare Berenice, jare opaete jae reta ndiwe yureko wae uyemboɨ reta wi, jare oë yuraa reta yembatɨrenda wi.